फोंडा: दूधसागर टूर ऑपरेटरसंबंधीच्या वादात नाहक स्थानिक आमदार तथा ‘जीटीडीसी’चे अध्यक्ष गणेश गावकर यांच्यावर शरसंधान करणे चुकीचे असून सावर्डे भाजप मंडळाचे अध्यक्ष विलास देसाई यांनी केलेल्या वक्तव्याचे जोरदार खंडन सावर्डे मतदारसंघातील पंचायत प्रतिनिधी तसेच भाजप कार्यकर्त्यांनी केले. पक्षश्रेष्ठींनीच विलास देसाई यांच्यावर कारवाई करावी, अशीही मागणी करण्यात आली.

आज (मंगळवारी) फोंड्यात घेतलेल्या पत्रकार परिषदेत यासंबंधी भाजप प्रदेशाध्यक्षांकडे तक्रार करणार असल्याचे सांगण्यात आले. यावेळी दत्तप्रसाद सावर्डेकर, शिरिष देसाई, गोविंद शिगावकर, रुपेश देसाई, शशिकांत नाईक, मोहन गावकर तसेच इतर पंचायत प्रतिनिधी हजर होते.

दूधसागर पर्यटनावर ‘जीटीडीसी’ची वक्रदृष्टी!

दूधसागर येथील जीप असोसिएशनचा संघर्ष सध्या चर्चेचा विषय बनला आहे. ३० वर्षांपूर्वीपासून सुरळीत सुरु असलेल्या पर्यटन व्यवसायावर आता जीटीडीसीची वक्रदृष्टी पडल्याने व्यावसायिकांना अडचणींचा सामना करावा लागत आहे,असा आरोप गोवा बसमालक संघटनेचे सरचिटणीस सुदीप ताम्हणकर यांनी केला आहे.