सासष्टी: कोलवा समुद्र किनारा परिसरात सौंदर्यीकरणाच्या नावाखाली लाखो, करोडो रुपये खर्च करून सुशोभीकरण केले होते. मात्र काहीच दिवसात या सुशोभीकरण कामाचा दर्जा किती निकृष्ट आहे, हे मागे काही दिवस पडलेल्या अवकाळी पावसाने दाखवून दिले.

स्थानिक अरुण कालेकर म्हणाले, रस्त्यावरील वीज खांब गंजलेले असून ते एक एक करून कोसळत आहे. अवकाळी पावसाच्या वेळी चार ते पाच खांबे कोसळले. सुदैवाने ते लोकांवर पडले नाहीत. मात्र वीज खात्याने किंवा पर्यटन खात्याने त्याची दखल घेतलेली नाही, ते तसेच पडून आहेत. किनारी भागाच्या सौंदर्यीकरणासाठी केंद्र सरकारने करोडो रुपयांची योजना आखली आहे. त्याचा विनियोग योग्य प्रकारे करावा, अशी आपली मागणी आहे.

स्थानिक नागरिक सिमांव रॉड्रिग्स म्हणाले, ज्या प्रकारचे वीज खांब येथे आहेत, ते येथील परिस्थितीला अनुकूल नाहीत. येथे खारट वारा वाहतो, पाणीही खारट आहे. त्यामुळे लोखंड लवकरच गंजते. त्यासाठी वेगळ्या तंत्रज्ञानाचा वापर होणे आवश्यक आहे.