राज्यात सध्या कॅश फॉर जॉब प्रकरणावरुन राजकीय घमासान पाहायला मिळत आहे. विरोधकांनी सावंत सरकारला निशाण्यावर घेतले आहे. भाजप पक्षाचे पदाधिकारी-कार्यकर्ते आणि मंत्र्यांचे निकवर्तीय या प्रकरणात सामील असल्याची घणाघाती टीका विरोधकांकडून करण्यात आली. विरोधक सातत्याने न्यायालयीन चौकशीची मागणी करतायेत. मात्र सरकार पोलीस चौकशीवर भर देवून प्रकरण रेटण्याचा प्रयत्न करतेय. याच पाश्वभूमीवर राज्याचे मुख्यमंत्री डॉ. प्रमोद सावंत यांनी या प्रकरणी मोठे वक्तव्य केले. या प्रकरणात गुंतलेल्यांना सरकार अजिबात सोडणार नाही. त्यांची मालमत्ता जप्त करुन फसवणूक झालेल्या लोकांचे परत केले जातील, असे मुख्यमंत्री सावंत यांनी म्हटले. तसेच, आतापर्यंत 18 जणांवर कारवाई करण्यात आल्याचेही त्यांनी सांगितले.