सरकारी नोकरीचे आमिष दाखवून गंडा घालणाऱ्या पूजा, दीपाश्री आणि प्रिया या महिलांची राज्यात सर्वत्र चर्चा सुरु आहे. या तिन्ही महिलांना पोलिसांनी ताब्यात घेतले असून त्यांच्याकडून मुद्देमालही जप्त करण्यात आला आहे. मात्र दुसरीकडे, या जॉब स्कॅमवरुन राज्यातील राजकीय वातावरण ढवळून निघालं आहे. विरोधकांनी सत्ताधारी सावंत सरकारला निशाण्यावर घेतले आहे. गोवा फॉरवर्ड पक्षाचे सर्वेसर्वा आणि आमदार विजय सरदेसाई यांनी या जॉब स्कॅमच्या चौकशीसाठी एसआयटी स्थापन करण्याची मागणी केली. तर आज (5 नोव्हेंबर) आम आदमी पक्षाचे नेते अमित पालेकर यांनी या प्रकरणावरुन सरकारवर टीकास्त्र डागलं. पालेकर यांनी पत्रकार परिषद घेवून या प्रकरणाची न्यायालयीन चौकशी करण्याची मागणी केली.