राज्यात गेल्या काही दिवसांपासून कॅश फॉर जॉब प्रकरणावरुन राजकीय वादंग माजला आहे. सातत्याने नव-नवे खुलासे होत आहेत. यातच आता, राज्याचे माजी मुख्यमंत्री आणि ज्येष्ठ नेते लक्ष्मीकांत पार्सेकर या प्रकरणी रोखठोक बोलले. पार्सेकरांनी आपल्या वक्तव्यातून सरकारलाही घरचा आहेर दिला.

पार्सेकर म्हणाले की, ''पोलिस विभागाने योग्य तपासाशिवाय कोणालाही प्रमाणपत्र देऊ नये. एजंटांना अटक करण्यात आली असली तरी राजकीय सहभागाशिवाय हे शक्य झालेले नाही. माझ्या कार्यकाळात असे काही प्रकरण सिद्ध झाल्यास मी राजकारण सोडले असते. हा घोटाळा म्हणजे तरुण पिढीवर होणारा अन्याय आहे."

दरम्यान, पार्सेकरांच्या वक्तव्यानंतर भाजपातील काही घटकांनी मात्र भुवया उंचावल्या आहेत. असे प्रकार पार्सेकरांच्या कार्यकाळातही घडले असल्याची चर्चा सुरु झाली आहे. पार्सेकर मुख्यमंत्रिपदी असताना त्यांच्या अखेरच्या दिवसांत नोकरभरती थांबवण्यात आली होती. 'त्या' प्रक्रियेत अनेक आतबट्याचे व्यवहार झाले होते. त्यानंतर बरीच वर्षे उलटली; पण नोकऱ्याही नाहीत आणि पैसेही नाहीत, अशी काहींची गत झाली असल्याचे भाजपच्याच काही लोकांकडून बोलले जात आहे.