संसदेचे सध्या पावसाळी अधिवेशन सुरु आहे. लोकसभेतील विरोधी पक्षनेते राहुल गांधी यांनी जोरदार भाषण केले. राहुल यांनी आपल्या भाषणातून मोदी सरकारवर जोरदार निशाणा साधला. त्यांनी आपल्या भाषणादरम्यान भगवाना शिवाचा, गौतम बुद्धांचा, गुरुनानक देव आणि भगवान महाविरांचा फोटो दाखून त्यांनी दिलेल्या संदेशाबद्दल सांगितले. एवढेच नाहीतर हिंदू कधीही हिंसा भडकवू शकत नाही, असेही ते म्हणाले.

दरम्यान, राष्ट्रपतींच्या अभिभाषणावरील धन्यवाद प्रस्तावाच्या चर्चेदरम्यान आपल्या भाषणात राहुल गांधी म्हणाले की, स्वतःला हिंदू म्हणून घेणारे हिंसाचार भडकवत आहेत.

राहुल गांधींच्या हिंदू समाजावरील वक्तव्याचे गोव्यातही पडसाद उमटले. भाजपच्या वतीने रॅली काढण्यात आली, ज्यामध्ये राहुल गांधींचा प्रतिकात्मक पुतळा जाळण्यात आला. गोवा भाजपच्या वतीने त्यांच्या या वक्तव्याचा निषेध करण्यात आला.

वॉस्कोचे आमदार कृष्णा साळकर म्हणाले की, 'राहुल गांधी यांच्या हिंदूविरोधी वक्तव्यचा मी निषेध करतो. भाजपचे ज्येष्ठ नेते आणि पंतप्रधान अटलबिहारी वाजपेयी असो की मग गोव्याचे माजी मुख्यमंत्री मनोहर पर्रीकर असो त्यांनी कधीच दुसऱ्या धर्माला ठेच पोहोचेल असे वक्तव्य कधीच केले नाही. मात्र राहुल गांधी यांनी हिंदूविरोधी वक्तव्य करुन अवघ्या हिंदू समाजाचा अपमान केलाय.'