सावईवेरे: बोणये-सावईवेरे भागातील धर्मा गिरोडकर हे येथील डोंगरावरील आपल्या मळ्यात गेले असता त्यांच्यावर गव्या रेड्याने हल्ला केला. यात गव्या रेड्याचे शिंग त्यांच्या चेहऱ्याला लागल्याने ते जखमी झाले आहेत. ही घटना सोमवारी (ता.१५) सायं. ४ वा. च्या सुमारास घडली.

प्राप्त माहितीनुसार, धर्मा गिरोडकर हे सोमवारी सायंकाळी आपल्या मळ्यावर गेले होते. यावेळी खूप पाऊस पडत होता. त्यांनी रेनकोट परिधान केला होता. त्यामुळे त्यांना मागून येणाऱ्या गव्याची कल्पना आली नाही.

अचानक गव्याने त्यांच्यावर हल्ला केला असता ते जखमी अवस्थेत खाली पडले. त्यांच्या तोंडाला व डोक्याला मार लागला. अशा अवस्थेतच त्यांनी लोकांना हाका मारण्याचा प्रयत्न केला. काही स्थानिकांनी घटनास्थळी जाऊन त्यांना उचलले. नंतर प्राथमिक उपचारानंतर त्यांना गोवा वैद्यकीय महाविद्यालयात पाठविण्यात आले.