Villagers in Aldona Up in Arms Over Land Conversion and Private Jetty Proposal

म्हापसा: हळदोण्यातील अस्तित्वात असलेल्या जेटी वगळता शासकीय किंवा खासगी जागेत कुठल्याही नवीन तात्पुरती किंवा कायमस्वरुपी जेटी उभारणीसाठी अनुमती देऊ नये, असा एकमुखी ठराव हळदोणे पंचायतीच्या ग्रामसभेत मंजूर करण्यात आला.

सरपंच आश्‍विन डिसोझा यांच्या अध्यक्षतेखाली पॅरीस सेंटरमध्ये ही ग्रामसभा पार पडली. यावेळी माजी पंच थॉमस तावारीस यांनी वरील विषयवार मांडलेल्या प्रस्तावावर चर्चेनंतर हा ठराव मंजूर करण्यात आला. कॉस्मी फर्नांडिस यांनी या ठरावास अनुमोदन दिले.

थॉमस तावारीस यांनी मांडलेल्या प्रस्तावात पंचायत कार्यक्षेत्रात पर्यटन किंवा इतर कारणास्तव खासगी जेटी उभारण्यास प्रस्ताव पंचायतीकडे सादर करण्यात आलाय का? तसेच विद्यमान जेटीचे विस्तारीकरण केले जाणार का? असा प्रश्न त्यांनी मांडला. त्यावेळी कॉस्मी फर्नांडिस यांनी तसा प्रस्ताव असल्यास, त्यास परवानगी देऊ नये, अशी मागणी केली. सत्यवान केरकर यांनी फेरीबोटीचे धक्के जेटी म्हणून ग्राह्य धरले जातात का? असाही प्रश्न केला. यावर सरपंचांनी जेटीसाठी प्रस्ताव पंचायतीकडे सादर झाला नसल्याचे स्पष्ट केले. त्यानतर जेटीला परवानगी न देण्याचा निर्णय ग्रामसभेत मंजूर करण्यात आला.