Goa Para Swimming Competition 2024

पणजी: गोव्यात होणारी २४वी राष्ट्रीय पॅरा जलतरण स्पर्धा विक्रमी ठरली आहे. या स्पर्धेत देशभरातील ५१८ जलतरणपटू सहभागी झाले असून गतवर्षीच्या ४६४ स्पर्धकांची संख्या मागे पडली. कांपाल येथील जलतरण तलावात मंगळवारपर्यंत (ता. २२) स्पर्धा चालेल.

गोवा राज्य दिव्यांगजन आयुक्त कार्यालय यांच्यातर्फे राज्य दिव्यांगजन सक्षमीकरण खाते यांच्या सहयोगाने आणि भारतीय पॅरालिंपिक समिती व गोवा क्रीडा प्राधिकरणाच्या सहकार्याने राज्यात प्रथमच पॅरा जलतरण स्पर्धेचे आयोजन होत आहे. स्पर्धेत गोव्यातील चार पॅरा जलतरणपटूंचा सहभाग आहे.

स्पर्धेची माहिती शनिवारी पत्रकार परिषदेत दिव्यांगजन सक्षमीकरण खात्याचे मंत्री सुभाष फळदेसाई यांनी दिली. यावेळी राज्य दिव्यांगजन आयुक्त गुरुप्रसाद पावसकर, दिव्यांगजन सक्षमीकरण खात्याचे सचिव ई. वल्लावन, संचालिका वर्षा नाईक, राज्य दिव्यांगजन आयुक्त कार्यालयाचे सचिव ताहा हाझिक, भारतीय पॅरालिंपिक समितीच्या पॅरा जलतरणाचे अध्यक्ष वीरेंद्र दाबास यांची उपस्थिती होती.