आंध्रप्रदेशच्या काकीनाडा इथं जेम्स कॅमेरुनचा अवतार हा सिनेमा बघताना एका प्रेक्षकाचा मृत्यू झाल्याची घटना घडली आहे. सिनेमा बघत असताना अचानक हा प्रेक्षक बेशुद्ध होऊन जमिनीवर पडला; आणि काही वेळातच त्याचा दुर्देवी मृत्यू झाला.

जेम्स कॅमेरुनचा बहुचर्चित अवतार 2 हा सिनेमा आंध्रप्रदेशात एका थिएटर मध्ये लागला होता. चित्रपट सुरू झाला आणि अचानक लक्ष्मीरेड्डी श्रीनू नावाचा एक प्रेक्षक ओव्हर एक्साईट झाल्यामुळे जमिनीवर पडला. त्याला त्वरीत जवळच्या हॉस्पीटलमध्ये नेण्यात आले पण डॉक्टरांनी त्याला मृत घोषित केले.

लक्ष्मीरेड्डीच्या मृत्युचे कारण सांगताना डॉक्टर म्हणाले कि, त्याला सुरुवातीपासुनच ब्लड प्रेशरचा त्रास होता. सिनेमा बघताना लक्ष्मीरेड्डी खुप जास्त एक्साईट झाला आणि त्याचं ब्लड प्रेशर खुप वाढलं. त्याचा परिणाम म्हणजे लक्ष्मीरेड्डीला हृदयविकाराचा झटका आला.

2009 साली तैवानमध्ये अशाच पद्धतीने अवतार सिनेमा बघताना प्रेक्षक मरण पावल्याची घटना घडली होती. तैवानमधल्या 42 वर्षीय व्यक्तीला अवतार सिनेमा बघतानाच हृदयविकाराचा झटका आला होता.

दिग्दर्शक जेम्स कॅमेरुनचा अवतार 2 म्हणजेच अवतार: द वे ऑफ वॉटर' हा सिनेमा त्याच्याच 2009 साली आलेल्या 'अवतार'चा सिक्वल आहे. 16 डिसेंबरला हा सिनेमा रिलीज झाला आणि दोनच दिवसांत सिनेमाने 86 कोटी रुपयांची कमाई केली आहे.