Shabana Azmi on The Kerala Story: द केरळ स्टोरी' या चित्रपटावरुन सुरु झालेला वाद थांबण्याचे नाव घेत नाही आहे. या चित्रपटावरुन राजकीय वादही सुरु झाले आहे. हा चित्रपट ५ मे ला चित्रपटगृहांमध्ये रिलीज झाला. तसे तर हा चित्रपट रिलीज होण्यापुर्वीच सोशल मिडियावर चर्चेत होता. अनेकांनी या चित्रपटात दाखवण्यात आलेल्या गोष्टींवर आक्षेप घेत चित्रपटावर बंदी घालण्याची मागणी केली. आता ज्येष्ठ अभिनेत्री शबाना आझमी यांनी 'द केरळ स्टोरी'ला विरोध करणाऱ्यांना ट्विट करत चांगलेच फटकारले आहे.

ज्येष्ठ अभिनेत्री शबाना आझमी यांनी सोशल मीडियावर एक ट्विट केले आहे. या ट्विटमध्ये त्यांनी, 'द केरळ स्टोरी ते आमिर खानच्या लाल सिंग चड्ढा चित्रपटावर बंदी घालू पाहणाऱ्यांना ते चुकीचे वागत आहेत हे माहिती असले पाहिजे.

सेंट्रल बोर्ड ऑफ फिल्म सर्टिफिकेशनने एकदा चित्रपट पास केला की, तर कोणालाच एक्स्ट्रा कॉन्स्टिट्यूशनल अथॉरिटी होण्याचा अधिकार नाही' असे म्हटले आहे. शबाना आझमी यांचे हे ट्वीट सध्या सोशल मीडियावर चांगलेच व्हायरल होत आहे. या ट्विटवर अनेक युजर्संनी कमेंट देखील केल्या आहेत.

या चित्रपटाचे दिग्दर्शन सुदिप्तो सेनने केले आहे. या चित्रपटात चार सर्वसामान्य कॉलेजमधील मुलींना जगातील सर्वात खतरनाक दहशतवादी संघटनेत कशा प्रकारे सामिल करण्यात आले हे दाखवण्यात आले आहे.

जवळपास पाच महिन्यांपूर्वी या चित्रपटाचा टीझर रिलीज झाला होता. त्यानंतर 5 मे रोजी हा चित्रपट रिलीज झाला आहे. या चित्रपटाला प्रेक्षकांचा चांगला प्रतिसाद मिळत आहे. चित्रपटाने बॉक्स ऑफिसवर चांगली कमाई केली देखील केली आहे.

• ममता यांनी बंदीची घोषणा केली

पश्चिम बंगालच्या मुख्यमंत्री ममता बॅनर्जी यांनी सोमवारी 'द केरळ स्टोरी' वर तात्काळ बंदी घालण्याचे आदेश जारी केले, जेणेकरुन द्वेष आणि हिंसाचाराची घटना टाळता येईल. चित्रपट प्रदर्शित करणाऱ्या सिनेमागृहावर कारवाई करण्यात येईल, असे एका अधिकाऱ्याने सांगितले. आदल्या दिवशी, बॅनर्जी म्हणाल्या होत्या की, द केरळ स्टोरीमध्ये तथ्यांचा विपर्यास करण्यात आला आहे, ज्याचा केरळला बदनाम करण्याचा हेतू आहे.

अधिकाऱ्याच्या म्हणण्यानुसार, 'द्वेष आणि हिंसाचाराची घटना टाळण्यासाठी आणि राज्यात शांतता राखण्यासाठी मुख्यमंत्र्यांनी 'द केरळ स्टोरी' चित्रपटावर तात्काळ बंदी घालण्याचे आदेश दिले आहेत. या आदेशाचे कोणी उल्लंघन केल्यास त्या सिनेमागृहावर कारवाई करण्यात येईल. या चित्रपटाचे दिग्दर्शक सुदीप्तो सेन आहेत. हा चित्रपट केरळमधील महिलांच्या समूहाभोवती फिरतो, ज्यांना धर्मांतर करुन ISIS मध्ये सामील होण्यास भाग पाडले जाते. हा चित्रपट 5 मे रोजी प्रदर्शित झाला.

• द काश्मिर फाइल'चा दिग्दर्शकाचा ममता बॅनर्जीवर हल्लाबोल

दिग्दर्शक विवेक अग्निहोत्री यांनी आता ममता बर्नजीच्या व्हिडिओवर जोरदार टिका केली आहे. त्यांनी ट्विटमध्ये लिहिले की, "दीदी माझ्याबद्दल बोलत आहेत. होय, खिलाफतने भडकावलेल्या डायरेक्ट अॅक्शन डे हत्याकांडातील वाचलेल्यांची मुलाखत घेण्यासाठी मी बंगालमध्ये आलो होतो. तुम्ही इतके घाबरलात का? काश्मीर फाइल्स, हत्याकांड आणि त्याबद्दल होते. दहशतवाद. काश्मिरी लोकांची बदनामी करायची होती असे तुम्हाला का वाटते? राजकीय पक्षाकडून निधी मिळतो असे तुम्ही कशाच्या आधारावर म्हणता?"

विवेक अग्निहोत्री यांनी ममता बॅनर्जींना ट्विटरवर इशारा दिला की, "मी तुमच्यावर मानहानीचा खटला का दाखल करत नाही?"

दुसरीकडे, पश्चिम बंगालमधील 'द केरळ स्टोरी' वरील बंदीवरुन केंद्रीय मंत्री अनुराग ठाकूर यांनी मुख्यमंत्री ममता बॅनर्जी यांच्यावर निशाणा साधला. ठाकूर म्हणाले की, 'काँग्रेस आणि कम्युनिस्ट पक्षाचे लोक सत्तेत असताना वेगळंच बोलायचे आणि आता ते खोटा अपप्रचार करत आहेत. तुष्टीकरणाचे राजरकारण भारतातील मुलींचे आयुष्य उद्ध्वस्त करत आहे. राजकीय कारणामुळे विरोधी पक्षातील लोक निषेध करत आहेत.'

केंद्रीय मंत्री अनुराग ठाकूर पुढे म्हणाले की, 'पश्चिम बंगालसारख्या राज्याने चित्रपटावर बंदी घालून मोठा अन्याय केला आहे. तिथे एका निष्पाप मुलीवर बलात्कार करुन तिची हत्या करण्यात आली, यावर ममता बॅनर्जी काहीच बोलत नाहीत, पण चित्रपटावर बंदी घालत आहेत. अशा दहशतवादी संघटनेच्या पाठीशी उभे राहून आणि त्यांच्या विचारसरणीचा प्रचार करुन तुम्हाला काय मिळत आहे?'