बॉलिवूडमधील लोकप्रिय गायक सोनू निगम याचा एका कॉन्सर्टमधील खास व्हिडीओ सध्या सोशल मीडियावर तुफान व्हायरल होत आहे. आपल्या सुरेल आवाजाने अनेक वर्षे रसिकांच्या मनावर अधिराज्य गाजवणाऱ्या सोनूने या लाइव्ह कार्यक्रमात पुन्हा एकदा आपल्या गायकीची जादू दाखवून दिली आहे.

या व्हिडीओमध्ये सोनू निगम सुपरहिट चित्रपट कभी खुशी कभी गम मधील गाजलेले गाणे 'बोले चूडियां' सादर करताना दिसत आहे. विशेष म्हणजे, गाणे म्हणताना त्याने काही ओळी अगदी स्त्री गायकाच्या आवाजात गायल्या. त्याचा हा अनोखा प्रयोग पाहून उपस्थित प्रेक्षक अक्षरशः थक्क झाले. सोनूने आवाजातील चढ-उतार, लय आणि भावपूर्ण सादरीकरण इतक्या सफाईने केले की, क्षणभरासाठी तो खरोखरच महिला गायक असल्याचा भास निर्माण झाला.

स्टेजवर त्याच्यासोबत गाणे सादर करणारी महिला कलाकारदेखील सोनूचा हा आवाज ऐकून आश्चर्यचकित झाल्याचे व्हिडीओमध्ये स्पष्ट दिसते. तिच्या चेहऱ्यावरील भाव आणि प्रेक्षकांच्या टाळ्यांचा कडकडाट यामुळे कार्यक्रमाचे वातावरण आणखी रंगतदार झाले.

हा व्हिडीओ सोशल मीडियावर शेअर होताच काही तासांतच लाखो व्ह्यूज मिळाले. चाहत्यांनी कमेंट्सच्या माध्यमातून सोनूवर कौतुकाचा वर्षाव केला आहे. “सोनू तुझ्यासारखा कोणी नाही”, “खरा मल्टिटॅलेन्टेड आर्टिस्ट”, “एकच नंबर” अशा प्रतिक्रिया चाहत्यांनी दिल्या आहेत. अनेकांनी त्याच्या आवाजातील विविधता आणि प्रयोगशीलतेचे विशेष कौतुक केले आहे.

सोनू निगम याने यापूर्वीही अनेक लाइव्ह कॉन्सर्टमध्ये वेगवेगळे प्रयोग करून रसिकांची मने जिंकली आहेत. मात्र ‘बोले चूडिया’ गाण्यातील हा खास अंदाज चाहत्यांसाठी संस्मरणीय ठरत आहे. त्याच्या या परफॉर्मन्समुळे पुन्हा एकदा तो सोशल मीडियावर चर्चेचा विषय ठरला आहे.