'बाहुबली'सारखा ब्लॉकबस्टर चित्रपट बनवणारे दिग्दर्शक एसएस राजामौली यांच्या 'RRR' या चित्रपटाला भरघोस यश मिळाले आहे. हा चित्रपट अनेक भाषांमध्ये प्रदर्शित झाला असून जवळजवळ प्रत्येक आवृत्ती एकत्रित करून, RRR ने बॉक्स ऑफिसवर 1000 कोटींहून अधिक कमाई केली आहे. बॉक्स ऑफिसवर चित्रपटाला मिळालेल्या भरघोस प्रतिसादामुळे निर्माते खूप खूश आहेत. यामुळे मुंबईत राम चरण आणि ज्युनियर एनटीआर यांच्या 'आरआरआर' च्या सक्सेस पार्टीचे आयोजन करण्यात आले होते. (RRR Success Party News)

* हे कलाकार पार्टीत सहभागी
RRR या चित्रपटाच्या सक्सेस पार्टीमध्ये चित्रपटाचे दोन्ही मुख्य नायक राम चरण आणि ज्युनियर एनटीआर यांच्या उपस्थितीने पार्टीची शोभा वाढली होती. या पार्टीत अभिनेता राम चरण अनवाणी पोहोचला होता यामुळे त्याने अनेकांचे लक्ष वेधून घेतले होते. पार्टीत करण जोहर, आमिर खान, जॉनी लीव्हर, राखी सावंत, जयंतीलाल गडा, सतीश कौशिक आणि जावेद अख्तर यांच्यासह सर्व बॉलिवूड स्टार्स उपस्थित होते.

* अजय देवगण आणि आलिया होते गैरहजर
एसएस राजामौली यांच्या RRR या चित्रपटामध्ये अभिनेते अजय देवगण आणि आलिया भट्ट यांनी महत्त्वाच्या भूमिका साकारल्या आहेत. चित्रपटाच्या सक्सेस पार्टीतून दोन्ही कलाकार गायब होते. अलीकडे, अशी बातमी आली होती की आलिया भट्ट चित्रपटात (Movie) तिची स्क्रीन स्पेस पाहून खूश नाही आणि म्हणूनच तिने सोशल मीडियावरून आरआरआरशी संबंधित काही पोस्ट काढून टाकल्या आहेत. यानंतर आलियाने असे काही नसल्याचे स्पष्ट केले होते. तसे, सध्या आलिया भट्टच्या लग्नाच्या चर्चा सुरू आहेत. कदाचित आलिया लग्नाच्या तयारीत व्यस्त आहे. आता अशा परिस्थितीत तिचे आरआरआरच्या पार्टीत न येणे समजण्यासारखे आहे, पण अजय देवगण कोणत्या कारणांमुळे गैरहजर होते ? हा प्रश्न आता चाहत्यांना पडला आहे.