Punjabi Singer Nirvair Singh: सिद्धू मुसेवाला यांच्यानंतर आता आणखी एका पंजाबी गायकाचा मृत्यू झाला आहे. पंजाबमधील लोकप्रिय गायक निरवैर सिंग यांना ऑस्ट्रेलियात झालेल्या भीषण कार अपघातात आपला जीव गमवावा लागला आहे. ऑस्ट्रेलियन मीडिया रिपोर्टनुसार, पंजाबी गायक निरवैर सिंग यांचा मेलबर्गजवळ एका भीषण कार अपघातात मृत्यू झाला आहे. 30 ऑगस्ट रोजी हा अपघात झाला होता.

मीडिया रिपोर्ट्सनुसार, निरवैर सेडान कारमधून जात असताना मेलबर्नजवळ त्यांच्या कारला अचानक अपघात झाला. ही घटना डिगर्स रेस्टमध्ये बुल्ला-डिगर्स रेस्ट रोडवर घडली. या संपूर्ण प्रकरणात 23 वर्षीय तरुणाला अटक करण्यात आली असून त्याला आरोपी करण्यात आले आहे. अपघातानंतर निरवैर ज्या कारमधून प्रवास करत होते, ती कार जीपला धडकली.

अनेक वर्षांपूर्वी ऑस्ट्रेलियाला गेले

प्रसिद्ध पंजाबी गायक निरवैर सिंग (Punjabi Singer Nirvair Singh) अनेक वर्षांपूर्वी आपले करिअर करण्यासाठी ऑस्ट्रेलियाला (Australia) गेले होते. पोलिसांनी (Police) दिलेल्या माहितीनुसार, चुकीच्या पद्धतीने गाडी चालवल्याने आणि तीन वाहने एकमेकांवर आदळल्याने हा अपघात झाला. निर्वैरबद्दल बोलायचे झाल्यास, त्यांच्या 'माय टर्न' अल्बममधील 'तेरे बिन' हे गाणे खूप गाजले होते. निरवैर हे पंजाबमधील (Punjab) कुरळी येथील रहिवासी होते. लग्नही ऑस्ट्रेलियाला शिफ्ट झाल्यानंतरच झाले होते.