बंगाली अभिनेत्री पल्लवी डे हिने 15 मे रोजी सकाळी गळफास घेत आत्महत्या केल्याची घटना घडली होती. याला अवघे 10 दिवस होत नाहीत तोपर्यंत पुन्हा 21 वर्षीय लोकप्रिय बंगाली टीव्ही अभिनेत्री बिदिशा दे मजुमदार हिने आत्महत्या केल्याची बाब समोर आली आहे. त्यामूळे बंगाली सिनेक्षेत्राला दूसरा धक्का बसला आहे. बिदिशाने 25 मे रोजी संध्याकाळी मृत्यूला कवटाळले आहे. मिळालेल्या माहितीनूसार प्रियकरासोबतच्या बिघडलेल्या नात्यामुळे बिदिशाने हे टोकाचे पाऊल उचलल्याचं बोललं जात आहे. (Bengali actress Bidisha De Majumdar commits suicide )

मॉडेल बिदिशा हिचा मृतदेह दम दम नगरबाजार येथील भाड्याच्या अपार्टमेंटमध्ये लटकलेल्या अवस्थेत आढळून आला. बिदिशा दीड महिन्यापूर्वीच या फ्लॅटमध्ये शिफ्ट झाली होती. मिळालेल्या माहितीनुसार, पोलिसांनी बिदिशाच्या अपार्टमेंटमधून एक सुसाईड नोटही जप्त केली आहे. बिदिशाचे कुटुंबीय आणि तिच्या मित्रांनी सांगितले की, त्यांच्या नात्यात काही समस्या निर्माण झाल्या होत्या, त्यामुळे त्यांनी हे पाऊल उचलले. नवोदित मॉडेल आणि अभिनेत्रीच्या आत्महत्येच्या बातमीने बंगाली इंडस्ट्रीत सर्वांनाच धक्का बसला आहे.

अभिनेत्रीच्या एका जवळच्या मित्राने बिदिशामध्ये काहीतरी गडबड असल्याचा संशय घेऊन स्थानिक पोलिसांना फोन केला होता. त्यांना फोन केल्यानंतर पोलिस अपार्टमेंटमध्ये पोहोचले आणि अभिनेत्रीला लटकलेल्या अवस्थेत दिसले, त्यानंतर त्यांना फ्लॅटचा दरवाजा तोडावा लागला. वृत्तानुसार, पोलिसांनी एक सुसाइड नोट देखील जप्त केली आहे ज्यामध्ये बिदिशाने तिच्या मृत्यूसाठी कोणालाही जबाबदार धरले नाही.

प्रियकरासोबतच्या नात्यामुळे ती त्रस्त होती

अभिनेत्री एका जिम ट्रेनरसोबत रिलेशनशिपमध्ये असल्याचं बोललं जात आहे. त्यांच्या नात्यात काहीही चांगले चालत नव्हते, त्यामुळे बिदिशा खूप नाराज होती. बिदिशाचा बॉयफ्रेंड तिच्यासोबत रिलेशनशिपमध्ये राहूनही अनेक मुलींना डेट करत होता. त्यामुळे त्यांच्या नात्यात दुरावा निर्माण झाला होता. बिदिशाच्या जवळच्या मैत्रिणीने याबद्दल सांगितले की, अभिनेत्रीने तिच्या बिघडत चाललेल्या नात्याबद्दलही तिच्याशी बोलले. मात्र, बिदिशाला तिच्या व्यावसायिक आयुष्यात कोणतीही अडचण आली नाही. कारण त्याला सतत काम मिळत होते. पण, त्यांच्या नात्यामुळे ती त्रस्त होती.