Aamir Khan's New Ad: 'आदिपुरूष' चित्रपटाच्या टीझरवरून निर्माण झालेला वाद अजून शमलेला नसतानाच आता बॉलीवुडचा मिस्टर परफेक्शनिस्ट अभिनेता आमिर खान एका जाहिरातीच्या निमित्ताने पुन्हा एकदा वादात सापडण्याची शक्यता निर्माण झाली आहे. धार्मिक भावना दुखावल्याचा आरोप आमिरवर केला जात आहे.

अभिनेता आमिर खान याने अभिनेत्री कियारा आडवाणीसोबत एका खासगी बँकेसाठी नुकतीच एक जाहिरात केली. या जाहिरातीतून भावना दुखावल्याचा आरोप केला जात आहे. यावरून मध्य प्रदेशचे गृहमंत्री नरोत्तम मिश्रा यांनीही या जाहिरातीवर टीका केली आहे. लोकांच्या धार्मिक भावना दुखावू नका, असा सल्लाही त्यांनी आमिर खानला दिला आहे. या जाहिरातीला काही लोकांकडून विरोधही होऊ लागला आहे.

नरोत्तम मिश्रा म्हणाले की, आमिर खान एका खासगी बँकेच्या जाहिरातीत लग्नानंतर गृहप्रवेश करताना दाखवला आहे. ते ज्या प्रकारे दाखवले आहे, ते भावना दुखावणारे आहे. धार्मिक परंपरा, रितींवर केलेला हा प्रहार आहे. मला याबाबत तक्रारी प्राप्त झाल्या आहेत.

मी तर आमिर खान यांना सांगू इच्छितो की, ते जे कुठले चित्रपट किंवा जाहिराती करणार असतील त्यांनी भारतीय परंपरा आणि संस्कार लक्षात ठेवावे. त्यांनी असे कोणतेही काम करू नये ज्यातून कुणाच्या भावना दुखावतील. सातत्याने अशा प्रकारचे काम करून ते धार्मिक भावना दुखावण्याचा प्रयत्न ते करतात, जे चुकीचे आहे.

जाहिरातीत काय दाखवले आहे?

या जाहिरातीत आमिर आणि कियारा यांचे नुकतेच लग्न झाले असून ते गृहप्रवेश करताना दाखवले आहेत. तथापि, नेहमी वधु वराच्या घरी जात असते. पण या जाहिरातीत वराच्या भूमिकेत असलेला आमिर वधु कियाराच्या घरी गेलेला दाखवला आहे. कारण वधुचे वडिल आजारी आहेत. त्यातून आजारी सासऱ्यांसाठी नवराच लग्न करून बायकोच्या घरी येतो. वर्षानुवर्षे चालत आलेल्या परंपरा का आहेत? असा सवालही या जाहिरातीत केला आहे.

दरम्यान, सोशल मीडियातूनही या जाहिरातीवर आणि आमिरवर निशाणा साधला जात आहे. तर अनेकांकडून या जाहिरातीचे कौतूकही केले जात आहे. ट्रोलिंगवर आमिर किंवा कियारा यांची मात्र काही प्रतिक्रिया आलेली नाही. यापुर्वी आमिरच्या 'लाल सिंग चड्ढा'चित्रपटावर बहिष्काराची मोहिम चालली होती.