राज्यात काही तासातच मान्सून अंदमान आणि निकोबारच्या बेटांवर दाखल होणार असल्याचा अंदाज हवामान खात्याने दर्शविला आहे. तसेच कोकण किनारपट्टीसह राज्यातील 9 जिल्ह्यांना 'येलो अलर्ट' जारी करण्यात आला आहे. त्यामुळे महाराष्ट्रात (Maharashtra) देखील अनेक ठिकाणी पाऊस पडण्याची शक्यता आहे. पुढील दोन दिवसात केरळ किनारपट्टीवर मुसळधार पावसाची शक्यता हवामान खात्याने वर्तवली आहे. (Maharashtra Weather Updates News)

16 ते 19 मे महाराष्ट्रातील काही भागात पावसाची शक्यता हवामान खात्याने दर्शवली आहे. पश्चिम महाराष्ट्र, मराठवाडा येथे पावसाची (Rain) शक्यता सांगण्यात आली आहे. तर कोल्हापूर, सातार, सांगली तसेच मराठवाड्यातील परभणी, हिंगोली, नांदेड, लातूर या जिल्ह्यांना यलो अलर्ट देण्यात आला आहे. तसेच कोकणातील रत्नागिरी आणि सिंधुदुर्गमध्ये मध्यम स्वरुपाचा पाऊस पडण्याची शक्यता हवामान खात्याने दर्शवली आहे.

दरम्यान, हवामान विभागाने यंदा वेळेआधीच पाऊस दाखल होण्याची शक्यता वर्तवली होती. भारतीय हवामान विभागाने (IMD) दिलेल्या माहितीनुसार, यावर्षी नैऋत्य मान्सून देशात वेळेपूर्वी दाखल होऊ शकतो. तसेच आज मान्सून दक्षिण अंदमान समुद्र आणि आग्नेय बंगालच्या उपसागरात पोहोचण्याची शक्यता आहे. तर केरळमध्ये मान्सून साधारणपणे 1 जून रोजी दाखल होतो. परंतु, यंदा 27 मे रोजी केरळात मान्सूनचं आगमन होणार असल्याची माहिती भारतीय हवामान खात्याने दिली होती. मात्र, पुढच्या दोन दिवसात केरळमध्ये मुसळधार पावसाची शक्यता हवामान खात्याने आता वर्तवली आहे.