Shivsena: शिवसेनेत ठाकरे गट आणि शिंदे गट अशी फूट पडल्यापासून वाद विवाद सुरु आहेत. महत्वाचे म्हणजे, शिवसेना कोणत्या गटाची आणि शिवसेनेचे पक्षचिन्ह असलेले धनुष्यबाण कोणाचे यावरुन आरोप -प्रत्यारोप सुरु आहेत.

शिवसेना आणि धनुष्यबाण आपले असल्याचा दावा करत ठाकरे आणि शिंदे दोन्ही गटांनी न्यायालयाचा दरवाजा ठोठावला आहे. याबरोबरच केंद्रीय निवडणूक आयोगाकडे दोन्ही गटांनी धाव घेतली.

आज केंद्रीय निवडणूक आयोगासमोर कागदपत्रे व लेखी युक्तीवाद सादर करण्यात येणार आहे. त्यानंतर पुढील काही दिवसांत यावर निर्णय दिला जाणार असल्याचे म्हटले जात आहे. या आधी 20 जानेवारीला केंद्रीय निवडणूक आयोगाची सुनावणी झाली होती.

त्यावेळी दोन्ही गटांना 23 जानेवारी पर्यंत लेखी उत्तर सादर करण्याचे आदेश आयोगाने दिले होते. तसेच पुढील सुनीवणीसाठी 30 जानेवारी ही तारीख देण्यात आली आहे.

दरम्यान, सर्वोच्च न्यायालया( Supreme-Court)त देखील सत्ता संघर्षावर सुनावणी सुरू असून पुढील सुनावणी ही येत्या 14 फेब्रुवारीला होणार आहे. गेल्या वर्षी सप्टेंबर महिन्यात सर्वोच्च न्यायालयाने सुनावणीदरम्यान शिवसेना( Shivsena ) पक्ष आणि धनुष्यबाण चिन्हाबाबत निर्णय देण्याचे अधिकार केंद्रीय निवडणूक आयोगाला असल्याचे सांगितले होते.