महाराष्ट्रात मागील काही दिवसांपासून सुरु असलेले एसटी कर्मचाऱ्यांचे अंदोलन अजूनही थांबलेले नाही. ठाकरे सरकारने (Thackeray government) काही दिवसांपूर्वीच एसटी कर्मचाऱ्यांना दिलासा दिला होता. यातच राज्याचे परिवहन मंत्री अनिल परब (Transport Minister Anil Parab) यांनी आज एसटी कर्मचाऱ्यांच्या आंदोलनासंबंधी माध्यमाशी संवाद साधला.

परब यांनी यावेळी म्हटले, ''कामावर परतणाऱ्या कामगारांना धमकावण्याचे काही एक काम नाही. एसटी संपाच्या नावावर काही राजकीय व्यक्ती आणि पक्ष त्यांचा गैरफायदा घेण्याचा प्रयत्न करत आहेत. त्याचबरोबर मेस्मा कायदा कामगारांना लागू शकतो. एसटी अत्यावश्यक सेवेत येते. या आंदोलनावर तोडगा काढण्यासाठी आम्ही तत्पर आहोत. तसचे एसटी कर्मचाऱ्यांचा संप हा बेकायदेशीर आहे.''

महाराष्ट्र राज्याचे परिवहन मंत्री अनिल परब यांनी राज्यात सुरु असलेल्या कर्मचाऱ्यांच्या संपावरुन पत्रकार परिषद घेत सरकारची भूमिका स्पष्ट केली आहे. त्याचबरोबर कामगारांच्या पगारवाढीवरुन मागील काही दिवसांपासून पसरत असलेल्या अफवांवरही भाष्य केले. यावेळी परब म्हणाले, “ काही राजकीय विरोधक कामगारांची पगारवाढ ही फसवी असल्याचे सांगत सरकार लवकरच ही पगारवाढ मागे घेणार असल्याच्या अफवा पसरत आहेत. मात्र मी हे आता स्पष्ट करतो की, आम्ही एसटी कर्मचाऱ्यांच्या पगारवाढीचे आदेश काढले आहेत. त्यामुळे ही पगारवाढ मागे घेण्याचा कोणताच प्रश्न येत नाही.”

दरम्यान, मंत्री परब म्हणाले, एसटी महामंडळाच्या विलिनीकरणावर उच्च न्यायालयाने मागील काही दिवसांपूर्वी नेमलेल्या समितीच्या माध्यमातून निर्णय होईल असं सांगितलं होतं. तोपर्यंत ठाकरे सरकारने एसटी कामगारांबाबत सहानभुतीपूर्वक धोरण घेऊन चांगली पगारवाढ दिली आहे. मात्र दुसरीकडे ही पगारवाढ फसवी असून सरकार लवकरच मागे घेणार असल्याचे राज्यातील विरोधकांकडून सांगण्यात येत आहे. यावेळी मी स्पष्ट करतो की, सरकारने पगारवाढीचे आदेश दिले आहेत. त्यामुळे आता ही कामगारांना दिलेली पगारवाढी मागे घेण्याचा प्रश्नच उरत नाही.