Illegal Cattle Transport In Sindhudurg: गुरांची अवैधरित्या होणारी वाहतूक रोखण्यात सावंतवाडी पोलिसांना यश आले आहे. ही कारवाई शुक्रवारी रात्री 1 वाजण्याच्या सुमारास बावळाट तिठा येथे करण्यात आली. कारवाईत वाहनासह पोलिसांनी 18 गुरे जप्त केली आहेत.

याप्रकरणी आजरा येथील दोघा पिता पुत्रांना पोलिसांनी ताब्यात घेतले असून गुरांना गोव्यातील फोंडा येथील गोशाळेत पाठविण्यात आली आहे. तसेच ही वाहने कत्तलीसाठी नेण्यात येत असल्याचा संशय व्यक्त केला जात आहे.

आंबोली दुरक्षेत्राचे हवालदार जगदिश दुधवडकर यांनी दिलेल्या माहितीनुसार, गुरांची वाहतूक केली जात असल्याची माहिती काही तरुणांकडून पोलिसांना मिळाली होती. ही वाहतूक कुडाळहून आंबोलीच्या दिशेने केली जात होती. माहितीच्या आधारे पोलिसांनी बावळाट तिठा येथे सापळा रचत ट्रक तपासणीसाठी थांबविला.

ट्रकची तपासणी केली असता त्यात तब्बल 18 गुरे असल्याचे समोर आले. गुरांची वाहतूक करणाऱ्या इसाक अब्दुल नेसरीकर आणि तौसिफ नेसरीकर दोघेही रा. आजरा. कोल्हापूर या पिता पुत्रांना ताब्यात घेण्यात आले. तर गुरे फोंडा येथील गोशाळेत पाठविण्यात आली.

गुरांची वाहतूक केल्याप्रकरणी त्यांच्यावर गुन्हा दाखल करण्यात आला मात्र त्यांना नोटिस देवून सोडण्यात आले. याबाबतची माहिती ठाणे अंमलदार आबा पिरणकर यांनी दिली. वाहतूक पोलिस प्रशांत धुमाळे यांनी याबाबतची तक्रार दिली होती.