मुंबई एनसीबीचे झोनल डायरेक्टर समीर वानखेडे यांची बदली करण्यात आली आहे. त्यांचा मुंबई एनसीबीमधील कार्यकाळ संपला होता. आता त्यांना DRI (Directorate of Revenue Intelligence-DRI) विभागाकडे पाठवण्यात आले आहे. मुंबई एनसीबीमध्ये झोनल डायरेक्टर पदावर येण्यापूर्वी समीर वानखेडे या विभागात होते. डीआरआय विभागातूनच त्यांना मुंबई एनसीबीमध्ये आणून झोनल डायरेक्टर करण्यात आले. आता त्यांना पुन्हा डीआरआयकडे पाठवण्यात आले आहे. यातच आता महाराष्ट्र राज्याचे अल्पसंख्यांक मंत्री नवाब मलिक यांनी माध्यमाशी बोलताना समीर वानखेडे यांच्यावर निशाणा साधला.

यावेळी माध्यमाशी बोलताना मलिक म्हणाले, समीर वानखेडे यांची बदली करण्याचा केंद्र सरकारने घेतलेला निर्णय योग्य आहे. एखादा अधिकारी मर्यादेच्या पुढे जाऊन कार्य करत असेल तर त्याच्यावर कारवाई होणे आपेक्षित असते. त्याचबरोबर समीर वानखेडेंच्या कामाचा आम्ही पाठपुरावा देखील करणार आहोत. तसेच वानखेडे यांच्या मनमानी कारभाराला चाप लावण्यासाठी हा घेतलेला निर्णय योग्य आहे. त्याचबरोबर माझ्याविरोधात असलेल्या कोणत्याही तक्रारीला मी सामोरे जाण्यासाठी तयार आहे.