दोडामार्ग: तिलारी परिसरात चर्चेचा विषय ठरलेला ओंकार हत्ती आपल्या कुटुंबाच्याजवळ पोहोचला आहे. तो आपल्या मूळ कळपाकडे जाणार असल्याने तेथील शेतकऱ्यांत मात्र भीतीचे वातावरण पसरले आहे. गेल्या काही दिवसांपासून ओंकार वेगळ्या भागात असल्याने त्याच्या हालचालींकडे वन विभागासह नागरिकांचेही लक्ष लागले होते.

ओंकार हत्ती बांदा परिसरात मानवी वस्तीच्या आसपास भटकत होता. शेतीचे नुकसान करीत असला तरी त्याठिकाणी त्याला ''सेलिब्रिटी''सारखी वागणूक दिली जात होती; मात्र परिस्थिती चिघळू न देता वन विभागाने संयमाने पावले उचलली.

ओंकारच्या वर्तनाचा अभ्यास, त्याच्या हालचालींचे निरीक्षण आणि नैसर्गिक मार्गांचा वापर करून त्याला त्याच्या नैसर्गिक अधिवासात सोडण्याचा निर्णय न्यायालयाने दिला. त्यामुळे ओंकार आता पुन्हा आपल्या कुटुंबात सामील होणार आहे.

कळपापासून दुरावलेला हत्ती एकटाच भ्रमंती करीत होता. दरम्यान, तिलारी खोऱ्यात असलेला कळप घाटमाथ्यावर पोहोचला होता; मात्र काही दिवसांपूर्वी तो पुन्हा माघारी फिरला आहे. सध्या या कळपाचा वावर हेवाळे परिसरात आहे.