राष्ट्रवादीचे नेते नवाब मलिक (Nawab Malik) आणि नार्कोटिक्स कंट्रोल ब्युरोचे (NCB) झोनल डायरेक्टर समीर वानखेडे (Sameer Wankhede) यांच्यातील युद्ध थांबण्याचे नाव घेत नाही आहे. राष्ट्रवादीचे नेते आणि महाराष्ट्राचे अल्पसंख्याक विकास मंत्री नवाब मलिक यांनी पुन्हा एकदा एनसीबी अधिकारी समीर वानखेडे यांच्यावर निशाणा साधला आहे. मलिक यांनी समीर वानखेडेचा आणखीन एक फोटो ट्विटरवर पोस्ट केला आहे. ज्यामध्ये नवाब मलिक दावा करत आहेत की समीर वानखेडेंचा विवाह सोहळा इस्लामनुसार पार पडला होता. (Nawab Malik attack on Sameer Wankhede By posting new photo on twitter)

या फोटोमध्ये नवाब मलिक दावा करत आहेत की, एक मौलवी समीर वानखेडेला लग्नासाठी घेऊन येत आहे. आणि वानखेडे टोपी घालून 'कुबूल है' म्हणताना दिसत आहेत. नवाब मलिक यांनी रविवारी रात्री उशिरा समीर वानखेडेचा फोटो पोस्ट केला असून समीर वानखेडेंचा हा नवा फोटो ट्विटरवर पोस्ट करत नवाब मलिकने लिहिले की,”… कबूल है.. कबूल है.. कबूल है.. यह क्या किया तूने समीर दाऊद वानखेड़े ?”

यापूर्वी समीर वानखेडे यांच्या पत्नी अभिनेत्री क्रांती रेडकरने दोन फोटो ट्विट केले होते.पहिल्या फोटोमध्ये नवाब मलिक यांच्या ट्विटचा स्क्रीन शॉट आहे, तर दुसऱ्या फोटोमध्ये क्रांती रेडकर यांनी त्यावेळची माहिती दिली आहे. यासोबतच त्यांनी नवाब मलिकवर हल्ला करण्यासाठी वारंवार 'फेक' शब्दाचा वापर केला आहे.

क्रांती रेडकर म्हणाल्या, “पहिला फोटो बारचा असल्याचा दावा करतो. दुसऱ्या फोटोमध्ये सद्गुरु फॅमिली रेस्टॉरंट आणि बार दिसत आहे म्हणजे नवाब मलिक हे बार आहे असे म्हणणे चुकीचे आहे, पण ते फॅमिली रेस्टॉरंट देखील आहे. पुन्हा एकदा 'बनावट'. हे किती वेळा उघड करायचे? जबाबदार पदावर बसून ते हे लोक असे प्रकार करतात. समीर वानखेडे यांचे नाव बदनाम करण्यासाठी हा सगळा प्रकार सुरू आहे." असा आरोप क्रांती रेडकर यांनी केला होता.

वानखेडे यांच्या वडिलांनी इस्लाम धर्म स्वीकारल्याचा आरोप महाराष्ट्र सरकारचे मंत्री नवाब मलिक यांनी केला होता. परंतु वानखेडे यांना अनुसूचित जाती कोट्यातून सरकारी नोकरी मिळाली, जी मुस्लिम व्यक्तीला मिळू शकत नाही. तर दसुरीकडे वानखेडे आणि त्यांच्या वडलांनी हे आरोप फेटाळून लावले असून राष्ट्रवादी काँग्रेसचे नेते मलिक यांच्यावर मानहानीचा खटला देखील दाखल केला आहे.