मराठवाडा, विदर्भ आणि मध्य महाराष्ट्राच्या (Marathwada, Vidarbha and Central Maharashtra) अनेक भागांत सुरु असलेल्या पावसामध्ये पुढील दोन दिवसांत पुन्हा ब्रेक लागणार असल्याचे दिसत आहे. तर कोकणात बहुतांश भागात ठिकाणी तर उत्तर महाराष्ट्र अनेक ठिकाणी पावसाचा अंदाज वर्तविण्यात आला आहे.

दक्षिण ओडिसा आणि उत्तर आंध्र प्रदेश लगतच्या उपसागरात तयार झालेले कमी दाबाचे क्षेत्र विरुन गेले आहे. तर झारखंडच्या भागावर चक्राकार वाऱ्यांची परिस्थिती झाली आहे. विदर्भापासून तामिळनाडूपर्यंत दक्षिण आणि उत्तरेकडे कमी दाबाचा पट्टा सक्रिय झाला आहे. मॉन्सूनचे कमी दाबाचे क्षेत्र फिरोजपूरपासून बंगालच्या उपसागरात सक्रिय झाला आहे. उद्या नंदुरबार, पालघर, बुलडाणा, अकोला, वाशिम जिल्ह्यात काही ठिकाणी येलो अलर्ट देण्यात आला आहे.

आज ( बुधवार) सकाळपर्यंत विदर्भ, मराठवाड्यात मध्यम ते जोरदार पाऊस झाला. तर अनेक ठिकाणी मुसळधार पावसाची नोंद करण्यात आली. यंदा उत्तर महाराष्ट्राला पावसाने ओढ दिली आहे. पण तेथेही आता चांगला पाऊस झाला. परंतु कोकण, दक्षिण मध्य महाराष्ट्रात मात्र पाऊस कमी झाला आहे.