मशिदींवरील अनधिकृत भोंग्यांच्या मुद्द्यावरून आक्रमक झालेले मनसे प्रमुख राज ठाकरे यांनी थेट मुख्यमंत्री उद्धव ठाकरे यांना पत्र लिहिलं आहे. राज ठाकरे यांनी मुख्यमंत्री उद्धव ठाकरेंवर निशाणा साधला आहे. त्यांनी ट्विटरवर मुख्यमंत्री उद्धव ठाकरे यांना खुले पत्र लिहिले आहे. ज्यात राज ठाकरे म्हणाले आहेत की, मला राज्य सरकारला सांगायचे आहे की, आमच्या सहनशीलतेचा अंत पाहू नका. (Raj Thackeray Letter to CM Uddhav)

मनसे अध्यक्ष राज ठाकरे यांनी या ट्विटमध्ये पुढे लिहिले आहे की, 'सत्ता येते आणि जाते. ताम्रपट कोणी आणला नाही... उद्धव ठाकरे, तुम्हीही नाही.' याशिवाय या ट्विटसोबत त्यांनी मुख्यमंत्री उद्धव ठाकरे यांना लिहिलेले पत्रही पोस्ट केले आहे.

लाऊडस्पीकरवरून वाद

मशिदींमध्ये लावण्यात आलेल्या लाऊडस्पीकरवरून राज ठाकरे आणि महाराष्ट्र सरकारमध्ये वाद सुरू आहे. गेल्या अनेक दिवसांपासून या प्रकरणाची चर्चा सुरू आहे. याप्रकरणी राज ठाकरेंसह त्यांच्या अनेक समर्थकांवरही गुन्हा दाखल करण्यात आला आहे. त्यांनी औरंगाबादेत मोठी रॅली काढली होती, ज्यात हजारो समर्थकांनी हजेरी लावली होती. यानंतर पोलिसांनी रॅलीसंदर्भात गुन्हा दाखल केला. त्याच बरोबर राज ठाकरेंनी महाराष्ट्र सरकारला लाऊडस्पीकर हटवण्याचा अल्टिमेटमही अनेकदा दिला आहे. राज ठाकरे हे सातत्याने शिवसेना पक्षप्रमुख उद्धव ठाकरे यांच्यावर हिंदुत्व आणि विचारधारेबाबत प्रहार करत आहेत.