Maharashtra Family Suicide Case: महाराष्ट्राची सांस्कृतिक राजधानी असलेल्या पुणे जिल्ह्यातून एक धक्कादायक घटना समोर आली. पिंपरी-चिंचवड परिसरातील मोरवाडी येथे राहणाऱ्या एकाच कुटुंबातील पती, पत्नी आणि त्यांच्या 19 वर्षांच्या मुलीने सामूहिक आत्महत्या केल्याची खळबळजनक घटना उघडकीस आली. गंभीर आर्थिक अडचणींना कंटाळून या कुटुंबाने हे टोकाचे पाऊल उचलल्याचे प्राथमिक तपासात निष्पन्न झाले. घटनेची माहिती मिळताच संपूर्ण परिसरात एकच खळबळ उडाली.

हे कुटुंब मूळचे केरळ येथील रहिवासी असून गेल्या तीन वर्षांपासून पिंपरी-चिंचवडमधील मोरवाडी भागात भाड्याने राहत होते. मृत व्यक्तींमध्ये विनोद पिल्लई (वय 50), त्यांची पत्नी श्रीजा पिल्लई (वय 45) आणि त्यांची 19 वर्षांची मुलगी पूर्णिमा पिल्लई यांचा समावेश आहे. शनिवारी विनोद पिल्लई यांची रुग्णालयात उपचारादरम्यान प्राणज्योत मालवली, तर त्यांची पत्नी श्रीजा आणि मुलगी पूर्णिमा या दोघींना रविवारी डॉक्टरांनी मृत घोषित केले.

ही धक्कादायक घटना घडल्याचे तेव्हा समोर आले, जेव्हा श्रीजा पिल्लई ज्या मोरवाडीतील शाळेत कोऑर्डिनेटर म्हणून काम करत होत्या, तेथील सहकाऱ्यांनी त्या कामावर न आल्याने त्यांना फोन केला. सतत फोन करुनही त्यांनी कोणताही प्रतिसाद दिला नाही. यामुळे काळजी वाटल्याने सहकाऱ्यांनी जवळच राहणाऱ्या त्यांच्या नातेवाईकांना संपर्क साधला. नातेवाईकांनी तातडीने पिल्लई यांच्या घरी जाऊन पाहिले असता, घराचा दरवाजा उघडाच होता आणि आत तिघेही गंभीर व बेशुद्ध अवस्थेत पडलेले आढळले. त्यांनी तात्काळ पोलिसांना खबर देऊन तिघांनाही रुग्णालयात दाखल केले, मात्र उपचारादरम्यान तिघांचीही जीवनज्योत मालवली.

घटनास्थळी पोलिसांना (Police) एक सुसाइड नोट सापडली, ज्यामध्ये त्यांनी आपल्यावर असलेल्या भीषण आर्थिक संकटाचा आणि बिकट परिस्थितीचा उल्लेख केला. या सुसाइड नोटमध्ये त्यांनी आपल्या या आत्मघाती निर्णयासाठी कोणालाही दोषी धरु नये, असे स्पष्टपणे लिहिले. पोलिसांनी या प्रकरणी अकस्मात मृत्यूची नोंद केली असून, आर्थिक विवंचनेव्यतिरिक्त यामागे आणखी काही कारण आहे का, याचा सर्व बाजूंनी सखोल तपास सुरु केला. एकाच घरातील तीन व्यक्तींच्या अशा करुण अंतामुळे मोरवाडी आणि पिंपरी परिसरात शोककळा पसरली आहे.