महाराष्ट्रातील राजकारण मागील काही दिवसांपासून चांगलचं गाजत आहे. यातच गुणरत्न सदावर्ते यांना आज उच्च न्यायालयाकडून मोठा दिलासा मिळाला आहे. पुण्यात दाखल करण्यात आलेल्या गुन्ह्यामध्ये सदावर्ते यांना अटकपूर्व जामीन मंजूर करण्यात आला आहे.

काही दिवसांपूर्वी सदावर्ते (Gunaratna Sadavarte) यांनी मराठा समाजाबद्दल आक्षेपार्ह वक्तव्य केलं होतं. त्यावरुन सदावर्ते यांच्या विरोधात पुण्यात गुन्हा नोंदवण्यात आला होता. पुण्यातील (Pune) भारती विद्यापीठ पोलीस ठाण्यात 1 सप्टेंबर 2020 रोजी गुणरत्न सदावर्ते यांच्याविरोधात गुन्हा दाखल करण्यात आला होता. याबाबत अमर रामचंद्र पवार यांच्याकडून फिर्याद देण्यात आली होती.

तसेच, सदावर्ते यांनी मराठा समाजाविरोधात आक्षेपार्ह वक्तव्य केलं होतं, याची पडताळणी करण्यासाठी त्यांच्या आवाजाचे काही नमुने घेण आवश्यक असल्याचं महाराष्ट्र सरकारकडून न्यायालयात सांगण्यात आलं होतं. मात्र सातारा पोलिसांनी (Police) याच संदर्भात दाखल करण्यात आलेल्या गुन्ह्यात गुणरत्न सदावर्ते यांच्या आवाजाचे नमुने घेतलेले असल्याने आता पुन्हा त्यांच्या आवाजाचे नमुने घेण्याची काय गरज? असा सवालही उच्च न्यायालयाकडून (High Court) उपस्थित करण्यात आला होता.