Goa-Made Liquor Seized Kolhapur

कोल्हापूर: राज्य उत्पादन शुल्क विभागाच्या पथकाने केलेल्या कारवाईत गोवा बनावटीच्या दारूचा मोठा साठा जप्त केला. ३१ डिसेंबरच्या रात्री साने गुरुजी क्रशर चौकात केलेल्या या कारवाईत सुमारे चार लाख रुपयांच्या दारु जप्त करण्यात आलीय.

मिळालेल्या माहितीनुसार, राधानगरी मार्गावरुन गोवा बनावटीच्या दारूची अवैध वाहतूक होत असल्याची माहिती उत्पादन शुल्क विभागाच्या पथकाला मिळाली. या पथकाने शनिवारी मध्यरात्रीच्या सुमारास क्रशर चौकात सापळा रचून वाहनाची तपासणी केली. यावेळी एका टेम्पोमध्ये गोवा बनावटीच्या दारूचे 55 बॉक्स आढळून आले. या मद्याची एकूण किंमत सुमारे 4 लाख रुपये असल्याचे सांगण्यात येत आहे.

या कारवाईचे नेतृत्व उत्पादन शुल्क विभागाच्या अधीक्षक स्नेहलता नरवणे यांनी केले. तपास पथकात उपनिरीक्षक रोहिदास वाजे, सत्यवान भगत, उपनिरीक्षक मुकेश लाडके, जवान राहुल गुरव, गणेश सानप, प्रसाद पाटील, पंकज खानविलकर, किरण चोपडे, ज्योती शिंदे आणि सरिता पाटणे यांचा समावेश होता. अवैध दारू तस्करीच्या पार्श्वभूमीवर पथक तैनात करण्यात आले होते.

अधिका-यांनी दिलेल्या माहितीनुसार, याप्रकरणी अधिक तपास सुरु असून, दारूचा मूळ स्त्रोत आणि तस्करीत सामिल असलेल्या इतर आरोपींचा शोध घेण्याचे प्रयत्न केला जात आहेत.