शिवाजी पार्क तथा शिवतीर्थावर दसऱ्यादिवशी शिवसेनाप्रमुख उद्धव ठाकरे यांचाच मेळावा होणार असल्याचे स्पष्ट झाले आहे. तथापि, महाराष्ट्राचे मुख्यमंत्री एकनाथ शिंदे यांनी या विषयावर बोलताना, जर मी या विषयात हस्तक्षेप केला असता तर शिवतीर्थावर आमचाच मेळावा झाला असता, असे वक्तव्य केले आहे.

शिंदे गटाचा दसरा मेळावा बीकेसी मैदानावर होणार आहे. या मैदानाची पाहणी शिंदे यांनी केली, यावेळी ते प्रसारमाध्यमांशी बोलत होते.

मुख्यमंत्री एकनाथ शिंदे म्हणाले की, मुख्यमंत्री म्हणून मी परवानगी देताना हस्तक्षेप केला नाही. मी हस्तक्षेप केला असता तर आमचा मेळावा शिवतीर्थावर झाला असता. न्यायालयाच्या निर्णायाला सर्वोच्च न्यायालयात दाद मागावी, अशी आमच्या कार्यकर्त्यांची इच्छा होती, तथापि, मी मुख्यमंत्री आहे, कायदा आणि सुव्यवस्थेची जबाबदारी माझी आहे.

न्यायालयाच्या निर्णयाचा आम्ही आदर करतो. त्यामुळे आमचा मेळावा बीकेसीमध्येच घेण्याचे ठरवले. मैदान कोणतेही असो, आम्हाला बाळासाहेब ठाकरेंचे विचार पोहचवायचे आहेत. सदा सरवणकर आणि ठाकरे गटानेही शिवतीर्थावर दसऱा मेळाव्यासाठी परवानगी मागितली होती. पण दोघांनाही प्रशासनाने कायदा आणि सुव्यवस्थेचा प्रश्न निर्माण होऊ शकतो, यावरून परवानगी नाकारली होती. 'ते' (ठाकरे गट) हायकोर्टात गेले, त्यानंतर त्यांना परवानगी दिली गेली.

शिवतीर्थावर शिवसेनेच्या दसरा मेळाव्याची परंपरा अनेक वर्षांपासून आहे. मेळाव्यात पक्षप्रमुख शिवसैनिकांना मार्गदर्शन करत असतात. पण यंदा शिंदे गटाकडूनही दसरा मेळावा घेणार असल्याचे सांगत या मैदानावर दावा करण्यात आला होता.

त्यासाठी शिंदे गटाकडूनही अर्ज करण्यात आला होता. मुंबई न्यायालयाने दोन्ही गटाचे दावे ऐकून ठाकरे गटाच्या बाजूने निर्णय दिला होता. त्याआधी शिंदे गटाचे आमदार सदा सरवणकरांची याचिका न्यायालयाने फेटाळून लावली होती. ठाकरे गट आणि शिंदे गटातील अद्याप इतर काही निर्णयांवर सर्वोच्च न्यायालयात सुनावणी होणार आहे. तरा काही निर्णयावर निवडणूक आयोग निर्णय घेणार आहे.