पुणे: दिल्ली ते गोवा हजरत निजामुद्दीन एक्सप्रेस ही अति जलद धावणारी रेल्वे आता पुण्यातील जेजुरी रेल्वे स्थानकावर थांबा घेणार आहे. याबाबत हालचाली सुरु झाल्या असून, एप्रिलच्या पहिल्या आठवड्यापासून याची अंमलबजावणी होण्याची शक्यता आहे. गेल्या अनेक दिवसांपासून एक्सप्रेस जेजुरी स्थानकावर थांबण्याची मागणी केली जात होती, अखेर या मागणीला यश आले आहे.

जेजुरी रेल्वे स्थानकावरून अनेक जलदगती एक्सप्रेस धावतात दरम्यान, कोणतीच एक्सप्रेस स्थानकावर थांबत नसल्याने भाविकांची मोठी गैरसोय होत आहे. याबाबत भाविकांनी रेल्वे प्रशासनाकडे जेजुरी थांबा घेण्याची मागणी केली होती.

गेल्या काही दिवसांपासून याबाबत विचार सुरु होता. अखेर भाविकांकडून मोठ्या प्रमाणावर होत असलेल्या मागणीचा विचार करुन जेजुराचा थांबा घेण्याचा निर्णय घेण्यात आल्याची माहिती मिळतेय. येत्या एप्रिलपासून याची अंमलबजावणी होण्याची शक्यता आहे.

जेजुरी रेल्वे स्थानकापासून मंदिर दोन ते अडिच किलोमीटर अंतरावर आहे. दरम्यान, स्थानकांवर रेल्वे थांबा घेत नसल्याने भाविकांची मोठी गैरसोय होत होती. तसेच, खासगी वाहनाच्या मदतीने मंदिरापर्यंत जावे लागत असे. रेल्वेने थांबा घेतल्याचा त्याचा भाविकांना मोठा फायदा होणार आहे तसेच, अंतराची बचत होणार आहे. गोवा एक्सप्रेस जेजुरीला थांबल्यास या भागातील औद्योगिक क्षेत्राला देखील याचा मोठा लाभ होणार आहे.

जेजुरीला महाराष्ट्रातील विविध भागातून मोठ्या संख्येने भाविक हजेरी लावत असतात. याशिवाय परराज्यातून कर्नाटक, आंध्र ,तेलंगणा ,राजस्थान, गुजरात येथून देखील भाविक जेजुरीला येत असतात. पण, रेल्वे थांबत नसल्याने भाविकांना खासगी वाहनांचा वापर करावा लागतो. यामुळे जेजुरीचा थांबा करावा, अशी मागणी भाविक आणि लोक प्रतिनिधी करत होते.

दरम्यान, या मागणीचा विचार करण्यात आला असून, एप्रिलच्या पहिल्या आठवड्यापासून दिल्ली ते गोवा हजरत निजामुद्दीन एक्सप्रेस जेजुरी रेल्वे स्थानकावर थांबा घेणार असल्याची माहिती मिळाली आहे. यामुळे खंडोबाच्या भाविकांना मोठा दिलासा मिळाला आहे.