मुंबईतील वांद्रे येथील शास्त्रीनगर (Shastri Nagar) परिसरात मध्यरात्री 12.30 च्या सुमारास तीन मजली इमारत कोसळली. या घटनेत एकाचा मृत्यू झाला असून 18 जण गंभीर जखमी आहेत, अशी माहिती समोर आली आहे. जखमींवर रुग्णालयात दाखल करण्यात आले असून त्यांच्यावर उपचार सुरू आहेत.

घटनेची माहिती मिळताच बचाव पथक, अग्निशमन दलाच्या 4 गाड्या, पोलिस , रुग्णवाहिका आणि महापालिकेचे पथक घटनास्थळी दाखल झाले.

सदर घटनेबाबत माहिती देताना डीसीपी मंजुनाथ सिंगे यांनी सांगितलं की, "मध्यरात्री 12 वाजून 15 मिनिटांच्या सुमारास वांद्रे येथील शास्त्रीनगर मधील तीन मजली इमारत कोसळली. तळमजल्यावरील सर्व नागरिक सुखरूप असून, पहिल्या मजल्यावर 6 जणांना किरकोळ दुखापत झाली आहे. तर दुसऱ्या मजल्यावरील 17 जणांना गंभीर दुखापत झाली आहे. या पैकी एका व्यक्तीचा मृत्यू झाला आहे. तर इतर 16 लोकांना रुग्णालयात दाखल करण्यात आले आहे."

स्थानिकांनी दिलेल्या माहितीनुसार, एक तरुण कामासाठी कुठेतरी जात असताना त्याच्या डोळ्यांसमोर इमारत कोसळली. त्यानं घटनेचं गांभीर्य ओळखून इतरांच्या मदतीने तात्काळ बचावकार्य सुरु केले.