Maharashtra Gondia train accident: महाराष्ट्रातील गोंदियामध्ये आज एक भीषण रेल्वे दुर्घटना घडली आहे. गोंदियाजवळ 'भगत की कोठी' या मालगाडीला धडक बसली, त्यानंतर ट्रेनची एक बोगी रुळावरून घसरली. या अपघातात 50 जण जखमी झाले आहेत. यातील 13 जण गंभीर जखमी असल्याचे सांगण्यात येत आहे.

ही गाडी रायपूरहून नागपूरच्या दिशेने येत होती. त्यानंतर गोंदिया शहराजवळ भगत की कोठी गाडी मालगाडीला धडकली. यामध्ये रेल्वेचा एस 3 डबा रुळावरून घसरला. यामध्ये 13 जण गंभीर जखमी असल्याचे सांगण्यात येत आहे. हा अपघात रात्री उशिरा अडीचच्या सुमारास घडला. मालगाडी आणि पॅसेंजर ट्रेन भगत की कोठी दरम्यान सिग्नल न मिळाल्याने हा अपघात झाला. यात सुदैवाने एकाही प्रवाशाचा मृत्यू झाला नाही ही दिलासादायक बाब आहे. अपघाताला बळी पडलेली ट्रेन छत्तीसगडमधील बिलासपूरहून राजस्थानमधील जोधपूरला जात होती.

मागून ट्रेनची धडक

जखमी प्रवाशांना गोंदिया जिल्ह्यातील शासकीय व खासगी रुग्णालयात दाखल करण्यात आले आहे. मध्यरात्री ही घटना घडली. या दोन्ही गाड्या एकाच दिशेने म्हणजेच नागपूरच्या दिशेने जात होत्या. हिरवा सिग्नल मिळताच भगत ची कोठी ही गाडी पुढे निघाली. मात्र गोंदिया शहरापूर्वी मालगाडीला सिग्नल न मिळाल्याने ती रुळावर उभी होती. त्यामुळे भगत ची कोठी गाडीने मालगाडीला मागून धडक दिली आणि हा अपघात झाला.

भारतीय रेल्वेच्या म्हणण्यानुसार , पहाटे 4.30 वाजता री-रेल्मेंटचे काम पूर्ण झाल्यानंतर, बाधित ट्रेन सकाळी 5.24 वाजता घटनास्थळावरून निघाली आणि 5.44 वाजता गोंदियाला पोहोचली. त्याचवेळी सकाळी 5.45 वाजता अप आणि डाऊन वाहतूक पूर्ववत झाली.