भारताचा माजी कर्णधार आणि अनुभवी फलंदाज असणाऱ्या राहुल द्रविडची (Rahul Dravid) टीम इंडियाच्या (Team India) मुख्य प्रशिक्षकपदी निवड करण्यात आली आहे. बुधवारी क्रिकेट सल्लागार समितीने राहुल द्रविडची मुख्य प्रशिक्षकपदी एकमताने निवड केली. T20 विश्वचषकानंतर राहुल द्रविड मुख्य प्रशिक्षकपदाची जबाबदारी स्वीकारणार आहे. T20 विश्वचषकानंतर रवी शास्त्री (Ravi Shastri) यांचा कार्यकाळ संपणार असून आता द्रविडच्या मार्गदर्शनाखाली संघ पुढे जाणार आहे. राहुल द्रविड भारत-न्यूझीलंड मालिकेपासून प्रशिक्षकपदाची सुरुवात करणार आहे.

विश्वचषकानंतर विराट कोहली सुध्दा टी-ट्वेन्टी संघाचं कर्णधारपद सोडणार आहे. सध्याची टीम इंडियाची कामगिरी पाहता त्याच्याकडून एकदीवसीय संघाचे नेतृत्व काढून घेण्यात येणार अशी शक्यता वर्तविण्यात येत आहे. अशातच टीम इंडियाचा सलामीवीर असलेल्या रोहीत शर्माचं (Rohit Sharma) नाव आघाडीवर आहे.

दरम्यान, टीम इंडियाच्या प्रशिक्षकपदी निवड होण्यापूर्वी पार पडलेल्या एका मुलाखतीदरम्यान भारतीय संघाचा नवा कर्णधार कोण असणार? असा प्रश्न विचारण्यात आला असता राहुलने सूचकपणे वक्तव्य केले. माध्यामाच्या वृत्तानुसार, बीसीसीआयने मुलाखतीदरम्यान राहुल द्रविडला प्रश्न विचारला असता त्याने रोहित शर्माचं नाव स्पष्टपणे घेतलं. हीट मॅनकडे मर्यादीत षटकांच्या क्रिकेटचं अचूक ज्ञान आहे. विशेष म्हणजे या प्रकारातील तो स्टार आहे. त्यामुळे त्याच्या छत्रछायेखाली भारतीय संघ योग्यप्रकारे आपली कामगिरी पार पाडेल, असं द्रविडने म्हटले होते. त्याचबरोबर लोकेश राहुल टीमन इंडियाचा उपकर्णधार असावा असही त्याने यावेळी म्हटले. तसेच त्याच्याकडे उपकर्णधारपदाची क्षमता देखील असल्याचेही त्याने म्हटले आहे.