ICC ODI Cricket World Cup 2023, India vs Australia Final, Virat Kohli Fifty Record:

वनडे वर्ल्डकप 2023 स्पर्धेत रविवारी भारत आणि ऑस्ट्रेलिया संघात अंतिम सामना होत आहे. अहमदाबादमधील नरेंद्र मोदी आंतरराष्ट्रीय स्टेडियममध्ये होत असलेल्या या सामन्यात विराट कोहलीने अर्धशतक झळकावत काही विक्रमांना गवसणी घातली आहे.

विराटने या सामन्यात 63 चेंडूत 54 धावांची खेळी केली. या खेळीत त्याने 4 चौकार मारले. या खेळीसह त्याच्या आता 11 सामन्यांत 95.62 च्या सरासरीने 765 धावा झाल्या आहेत. यात त्याच्या 3 शतकांचा आणि 6 अर्धशतकांचा समावेश आहे.

त्यामुळे विराटने एका वर्ल्डकपमध्ये 750 धावा करणारा पहिला आणि एकमेव क्रिकेटपटू ठरला आहे. यापूर्वी कोणालाही वर्ल्डकपमध्ये एकाच पर्वात 700 धावांचा टप्पाही पार करता आला नव्हता.

तसेच विराटने या वर्ल्डकपमध्ये सलग पाचव्यांदा 50 धावांचा टप्पा पार केला आहे. त्यामुळे दोनदा वर्ल्डकपमध्ये सलग पाचवेळा 50 धावांचा टप्पा पार करणाराही तो पहिलाच खेळाडू ठरला आहे. त्याने 2019 वर्ल्डकपमध्येही सलग 5 अर्धशतके केली होती. तसेच 2015 वर्ल्डकपमध्ये स्टीव्ह स्मिथने सलग 5 वेळा 50 धावांचा टप्पा पार केलेला.

याबरोबरच विराटने न्यूझीलंडविरुद्ध उपांत्य फेरीत खेळतानाही शतकी खेळी केली होती. त्यामुळे तो वर्ल्डकपच्या उपांत्य आणि अंतिम सामन्यात 50 पेक्षा जास्त धावा करणारा भारताचा पहिला, तर जगातील सातवा खेळाडू ठरला आहे.

यापूर्वी माईक ब्रेअर्ली (1979), जावेद मियाँदाद (1987), अरविंद डी सिल्वा (1996), ग्रँट एलियट (2015) आणि स्टीव्ह स्मिथ (2015) यांनी असा कारनामा केला आहे.