Satwiksairaj Rankireddy and Chirag Shetty Runner-Up at China Masters Super 750 badminton tournament:

भारताची बॅडमिंटनमधील स्टार जोडी सात्विकसाईराज रांकिरेड्डी आणि चिराग शेट्टी सातत्याने चांगली कामगिरी करताना दिसत आहेत. नुकतीच त्यांनी शेनझेन येथे झालेल्या चायना मास्टर्स सुपर 750 स्पर्धेच्या पुरुष दुहेरीत अंतिम सामना खेळला.

मात्र, अंतिम सामन्यात सात्विक आणि चिराग यांना जागतिक क्रमावारीत अव्वल क्रमांकावर असलेल्या चीनच्या लियांग वेई केंग आणि वँग चँग या जोडीकडून पराभव स्विकारावा लागला. चीनच्या जोडीने सात्विक आणि चिराग यांचा तीन 19-21, 21-18, 19-21 अशा तीन गेममध्ये पराभव केला.

सात्विक आणि चिराग यांनी चीनच्या जोडीला शेवटपर्यंत चिवट झुंज दिली होती, पण अखेरीस त्यांना विजय मिळवण्याच अपयश आले. पहिल्या गेममध्ये लियांग-वँग जोडीने सुरुवातीलाच आघाडी मिळवली होती. ते 3-8 अशा आघाडीवर होते.

मात्र, नंतर सात्विक आणि चिरागनेही लय मिळवली आणि सलग चार पाँइंट्स मिळवले. त्यामुळे 9-9 अशी बरोबरीही झाली होती. त्यानंतरही चीनच्या जोडीचा खेळ उंचावर होता, पण चिराग आणि सात्विकही हार मानत नव्हते. 19-19 अशी बरोबरी झाल्यानंतर मात्र चीनच्या जोडीने सलग दोन पाँइंट्स जिंकले आणि पहिला गेम जिंकला.

दुसऱ्या गेममध्येही चीनच्या जोडीने चांगली सुरुवात केली होती. त्यांनी 1-4 अशी आघाडी मिळवली होती. मात्र भारतीय जोडीने चांगला संघर्ष करत 10-10 अशी बरोबरी केली आणि त्यानंतर आघाडी मिळवत ती शेवटपर्यंत टिकवली.

त्यामुळे दुसरा गेम सात्विक आणि चिराग यांनी 21-18 असा जिंकत सामन्यात बरोबरी साधली. त्याचमुळे हा सामना निर्णायक तिसऱ्या गेममध्ये गेला.

तिसऱ्या गेममध्ये लियांग-वँग जोडीने सुरुवातीलाच सलग 5 पाँइंट्स मिळवले. एका वेळी ते 1-8 अशा आघाडीवरही होते. पण सात्विक आणि चिराग यांनी त्यांना चूका करायला लावल्या. त्यांनी सलग तीन पाँइंट्स मिळवत चीनची आघाडी 8-11 अशी कमी केली.

यानंतरही चीनच्या जोडीने आक्रमक खेळ केला. त्यांनी सलग 4 पाँइंट्स मिळवले. त्यामुळे एका क्षणी भारतीय जोडी 10-19 अशा पिछाडीवर होती. मात्र, सात्विक आणि चिराग यांनी कडवी झुंज दिली आणि आघाडी 19-20 अशी कमी केली होती. पण अखेरीस चीनची जोडीचा खेळ भारी पडला आणि हा गेम लियांग-वँग यांनी 19-21 असा जिंकत सामनाही जिंकला.