पणजी: गोव्याची माजी राज्य बॅडमिंटन विजेती संध्या मेलाशीमी (Sandhya Melashimi) हिला अखिल भारतीय मास्टर्स मानांकन बॅडमिंटन स्पर्धेत (badminton tournament) दुहेरी किताबाची संधी आहे. तिने 35+ वयोगटातील महिला एकेरी व दुहेरीत अंतिम फेरी गाठली. या वयोगटात ती देशातील अव्वल मानांकित महिला बॅडमिंटनपटू आहे.

स्पर्धा नावेली येथील मनोहर पर्रीकर इनडोअर स्टेडियममध्ये सुरू आहे. स्पर्धेत विविध वयोगट उपांत्यपूर्व फेरी गाठल्यामुळे संध्या हिच्यासह संदीप व कमलेश हे कांजी बंधू, विशाल वेर्णेकर व अमित कक्कर, विल्फ्रेड जॅकिस, सी. के. अयूब यांचे स्पेनमध्ये होणाऱ्या जागतिक सीनियर बॅडमिंटन स्पर्धेसाठी पात्रता निश्चित झाली आहे. कांजी बंधू, तसेच विशाल व अमित यांनी 40+ वयोगटातील पुरुष दुहेरीत उपांत्यपूर्व फेरी गाठली. 50+ वयोगटात ऑस्कर सिल्वेरा व आग्नेल डायस, विल्फ्रेड जॅकिस व राजपाल सिंग यांनी, 55+ वयोगटात सी. के. अयुब व झेवियर राफेल यांनी उपांत्यपूर्व फेरीत प्रवेश केला आहे.