T20 WC 2022 Final Pak Vs Eng: टी-20 वर्ल्डकपमध्ये उद्या, रविवारी इंग्लंड विरूद्ध पाकिस्तान यांच्यात अंतिम सामना होत आहे. दरम्यान, वर्ल्डकप जिंकण्यासाठी दोन्ही संघ कसून सराव करत असून विविध हातखंडे वापरण्याच्या तयारीत आहेत. सुत्रांच्या माहितीनुसार पाकिस्तानी संघातील खेळाडु सध्या रोजा पाळत आहेत. अल्लाहची प्रार्थना केल्याने त्यांना 1992 प्रमाणे विश्वचषक जिंकता येईल, अशी पाकिस्तानी खेळाडुंची श्रद्धा आहे.

सन 1992 च्या क्रिकेट वर्ल्डकप स्पर्धेत पाकिस्तानने सेमीफायलनमध्ये न्यूझीलंडचा तर फायनलमध्ये इंग्लंडचा पराभव करून वर्ल्डकप जिंकला होता. विशेष म्हणजे, 1992 मध्येदेखील पाकिस्तानी संघाने तेव्हा रमजान महिना सुरू होता या कारणाने रोजा पाळला होता, आणि त्यांना वर्ल्डकपच्या रूपाने ईदी मिळाली होती. आता पाकिस्तान संघाला तो इतिहास पुन्हा घडेल असे वाटत आहे.

तशा घटनाही घडत आहेत. 1992 मध्ये एकदिवसीय क्रिकेटच्या वर्ल्डकपमध्ये इम्रान खानच्या नेतृत्वाखालील पाकिस्तानने सेमीफायनलमध्ये न्यूझीलंडला पराभूत केले होते. आताही पाकिस्तानने सेमीफायलनमध्ये न्यूझीलंडलाच पराभूत केले आहे. आणि आताही फायलनमध्ये पाकिस्तानची लढत इंग्लंडशीच होत आहे.

त्यामुळे सध्या बाबर आझमच्या नेतृत्वाखालील संपुर्ण पाकिस्तान संघासह त्यांचा सपोर्ट स्टाफदेखील दररोज रोजा पाळत आहे. सामन्याचा दिवस वगळता पाकिस्तानी संघातील तमाम खेळाडू रोजा पाळत आहेत. यावेळी ईद नसली तरी अल्लाह त्यांना आताही ईदी देईल, असा विश्वास पाकिस्तानी संघाला आहे. पाकिस्तानचे खेळाडू आणि नागरीक बऱ्याचदा सामान जिंकल्यानंतर अल्लाहचे आभार मानताना दिसतात. आता पाकिस्तानी संघ 1992 ची पुनरावृत्ती करणार का, याचीच उत्सुकता आहे.