पणजी : ऑलिव्हिया चौगुले आणि रितिका दावलकर यांनी ‘गद्रे’ गास्पार डायस खुल्या टेनिस स्पर्धेत अनुक्रमे 16 वर्षांखालील आणि 12 वर्षांखालील मुलींच्या एकेरीत विजेतेपद प्राप्त केले. पुरुष एकेरीत तेजस शेवडे आणि व्ही. प्रणीत यांनी उपांत्य फेरीत जागा मिळविली. स्पर्धा मिरामार येथील क्लब टेनिस द गास्पार डायस व कांपाल-पणजी येथील पणजी जिमखान्याच्या टेनिस कोर्टवर सुरू आहे.

ऑलिव्हियाने 16 वर्षांखालील मुलींच्या अंतिम लढतीत तन्वी पाटील हिच्यावर 4-1, 4-1 असा सोपा विजय प्राप्त केला. 12 वर्षांखालील अंतिम लढतीत (Match) रितिकाने आहाना पाटील हिच्यावर 4-1, 4-1 असा विजय नोंदविला.

गास्पार डायस टेनिस (Tennis) स्पर्धेत चार वेळा विजेतेपद मिळविलेल्या तेजसने पुरुष उपांत्यपूर्व लढतीत एम. राजू याला 4-1, 4-1 असे सरळ सेट्समध्ये हरविले. नंतर त्याने ऑलिव्हिया चौगुले हिच्यासह मिश्र दुहेरीचीही अंतिम फेरी गाठली.

उपांत्य फेरीत त्यांनी कामाक्षी शानभाग व शिवम बापट जोडीस नमविले. पुरुष एकेरीतील गतविजेता प्रणीत याने उपांत्य फेरीत प्रवेश करताना राहुल सिंग याला 4-3(2), 4-2 असे पराजित केले.

महिला एकेरीत उपांत्य फेरी गाठताना रिबेका जॉर्ज हिने अतिका गौर हिला 6-4 असे नमविले. पुरुषांच्या दुहेरीत काफिल कडवेकर आणि अश्विन नरसिंघानी यांनी राजेंद्र गुदिन्हो व मानो छब्रा जोडीस 4-3(2), 4-2 असे नमवून उपांत्य फेरी गाठली.