पणजी: एफसी गोवा संघ आगामी मोसमासाठी नव्या खेळाडूंना करारबद्ध करणार आहे. मागील मोसमात खेळलेल्या सहा खेळाडूंना त्यांनी बुधवारी मुक्त केले. यामध्ये संघ व्यवस्थापनाने 31 मे रोजी करार संपलेले इव्हान गोन्झालेझ, आल्बर्टो नोगेरो, ऐराम काब्रेरा हे स्पॅनिश, डिलन फॉक्स हा ऑस्ट्रेलियन, तसेच अलेक्झांडर रोमारियो जेसूराज व ख्रिस्ती डेव्हिस या भारतीय खेळाडूंना मुक्त केले आहे. (New players to join FC Goa)

2022 - 2023 मोसमासाठी एफसी गोवा संघात आता या खेळाडूंच्या जागी नवे सदस्य येतील. मुक्त केलेल्या खेळाडूंनी संघासाठी बजावलेल्या सेवेबद्दल क्लबने त्यांचे आभार मानले असून भावी कारकिर्दीसाठी सुयश चिंतिले आहे.

गोन्झालेझ व नोगेरा 2022 मध्ये एफसी गोवा संघात दाखल झाले. ते 2022-21, 2021-22 असे दोन मोसम खेळले. रोमारियो याने 2019 मध्ये करार केला होता. फॉक्स व काब्रेरा 2021 मध्ये संघात रुजू झाले. 2021-22 मोसमात ते एफसी गोवा संघात होते. डेव्हिस 2019 मध्ये एफसी गोवाच्या डेव्हलमेंट संघाशी करारबद्ध झाला. 2021 त्याला मुख्य संघात बढती मिळाली.

वाझकेझचा केरळा ब्लास्टर्सला निरोप

स्पॅनिश आघाडीपटू अल्वारो वाझकेझ याने केरळा ब्लास्टर्सचा निरोप घेतला आहे. वाझकेझ 2021-22 मोसमात आयएसएल उपविजेत्या केरळा ब्लास्टर्सचा मुख्य खेळाडू होता. 31 वर्षीय आघाडीपटू मोसमात 23 सामने खेळला. त्याने आठ गोल व दोन असिस्ट अशी कामगिरी नोंदविली. बार्सिलोना येथे जन्मलेला वाझकेझ आरसीडी इस्पॅन्योल संघातर्फे ला लिगा स्पर्धेत खेळला. नंतर त्याने गेटाफे सीएफ, तसेच स्वॅन्सी सिटी, जिम्नॅस्टिक द तारागोना, रियाल झारागोझा, स्पोर्टिंग द गिजॉन आदी सघांचे प्रतिनिधित्व केले. ला लिगा स्पर्धेत तो 150 पेक्षा जास्त, तर इंग्लिश प्रीमियर लीगमध्ये 12 सामने खेळला.