Vivo Pro Kabaddi League Auction 2022 : आगामी प्रो-कबड्डी स्पर्धेसाठी नवव्या हंगामासाठी गोव्याचा युवा खेळाडू नेहाल सावळ देसाई याला यूपी योद्धास संघाने दहा लाख रुपयांच्या बोलीवर करारबद्ध केले. स्पर्धेसाठी निवडला गेलेला तो पहिला गोमंतकीय कबड्डीपटू ठरला आहे.

हल्लीच हरियाणात झालेल्या 69व्या राष्ट्रीय सीनियर पुरुष कबड्डी स्पर्धेत गोव्याने उपांत्य फेरी गाठत ब्राँझपदक जिंकले. त्या स्पर्धेत नेहाल गोव्याचा प्रमुख चढाईपटू होता. स्पर्धेतील सहाही सामन्यांत तो खेळला होता.

‘‘प्रो-कबड्डी स्पर्धेसाठी निवड झाल्यामुळे आनंद झालाच आहे, मात्र आता जबाबदारीही वाढली आहे. कारकिर्दीतील अत्यंत मोलाचा क्षण आहे,’’ अशी प्रतिक्रिया नेहालने दिली. सध्या तो सोलापूर येथील बार्शी येथे शारीरिक शिक्षणातील पदव्युत्तर शिक्षण घेत आहे.

नेहालने गोवा कबड्डी संघटनेचे आश्रयदाते दत्ताराम (बाबू) कामत, अध्यक्ष रुक्मिणी कामत, शालेय शिक्षक, प्रशिक्षक, नेहमी प्रोत्साहन देणारे आई-वडील यांना कबड्डीतील आतापर्यंतच्या प्रगतीचे श्रेय दिले आहे.