पणजी ः स्पॅनिश इगोर आंगुलो व बिपिन सिंग यांनी नोंदविलेल्या प्रत्येकी दोन गोलच्या बळावर पुन्हा सूर गवसलेल्या गतविजेत्या मुंबई सिटीने आठव्या इंडियन सुपर लीग (आयएसएल) फुटबॉल (Football)स्पर्धेत रविवारी धडाकेबाज विजय नोंदविला. सामन्यावर पूर्ण वर्चस्व राखत त्यांनी ओडिशा एफसीचा 4-1 फरकाने धुव्वा उडविला आणि गुणतक्त्यात पहिल्या चार संघात स्थान मिळवून प्ले-ऑफ फेरीचा दावाही भक्कम केला.

सामना फातोर्डा (Fatorda)येथील पंडित जवाहरलाल नेहरू स्टेडियमवर झाला. इगोर आंगुलोने अनुक्रमे 41 व 70 व्या मिनिटास प्रत्येक एक गोल केला. त्यामुळे त्याची मोसमातील वैयक्तिक गोलसंख्या दहावर गेली. गेली काही सामने बिपिन सिंग गोलपासून दूर होता. आज त्याने पुन्हा फॉर्म प्राप्त करत अनुक्रमे 47 व 73 व्या मिनिटास गोल केला. या 26 वर्षीय खेळाडूने आता मोसमात पाच गोल नोंदविले आहेत. ओडिशाचा ब्राझीलियन स्ट्रायकर जोनाथस ख्रिस्तियन याने 90 व्या मिनिटास संघाची पिछाडी एका गोलने कमी केली. त्याचा हा मोसमातील सातवा गोल ठरला.

पराभवाचा वचपा

स्पर्धेच्या पहिल्या टप्प्यात वास्को येथे ओडिशाने मुंबई सिटीस 4-2 फरकाने नमविले होते, त्या धक्कादायक पराभवाचा वचपाही रविवारी डेस बकिंगहॅम यांच्या मार्गदर्शनाखालील संघाने काढला. मुंबई सिटीचा हा 15 लढतीतील सातवा विजय ठरला. त्यांचे 25 गुण झाले आहेत. समान गुणसंख्येत जमशेदपूर एफसीला (+8) तिसरा, तर मुंबई सिटीस (+6) चौथा क्रमांक मिळाला. ओडिशा एफसीला 16 लढतीत सातवा पराभव पत्करावा लागला. त्यामुळे 21 गुणांसह ते सातव्या स्थानी कायम राहिले.

आंगुलो गोल्डन बूटच्या शर्यतीत

मुंबई सिटीच्या38 वर्षीय इगोर आंगुलोने रविवारी दोन गोल नोंदवून सर्वाधिक गोलच्या गोल्डन बूट शर्यतीत आपले आव्हान कायम राखले. त्याचे आता 10 गोल झाले आहे. साखळी फेरीत मुंबई सिटीचे आणखी पाच सामने बाकी आहेत. आंगुलोने गतमोसमातील स्पर्धेत एफसी गोवातर्फे खेळताना 14 गोल नोंदवून गोल्डन बूटचा मान मिळविला होता. हैदराबादचा नायजेरियन आघाडीपटू बार्थोलोम्यू ओगबेचे याने 15 सामन्यांत 14 गोल केले असून तो अव्वल आहे.