T20 World Cup Indian Team: 2022 च्या T20 विश्वचषकापूर्वी भारतीय संघाला ऑस्ट्रेलिया आणि दक्षिण आफ्रिकेविरुद्ध मालिका खेळायची आहे. टी-20 विश्वचषकाच्या तयारीच्या दृष्टीने ऑस्ट्रेलिया आणि दक्षिण आफ्रिकेविरुद्धची मालिका महत्त्वाची ठरणार आहे. या दोन्ही मालिकेनंतर टीम इंडियामध्ये मोठे बदल होऊ शकतात. चला जाणून घेऊया कसे?

या खेळाडूला प्रवेश मिळू शकतो!

भारताचा स्टार गोलंदाज मोहम्मद शमीला टी-20 विश्वचषकासाठी भारतीय संघात स्थान मिळालेले नाही. त्याला स्टँडबाय खेळाडूंमध्ये ठेवण्यात आले आहे. मात्र शमीने ऑस्ट्रेलिया आणि दक्षिण आफ्रिकेविरुद्धच्या मालिकेत चांगली कामगिरी केल्यास त्याला मुख्य संघात स्थान मिळू शकते. शमी डेथ ओव्हर्समध्ये चांगली गोलंदाजी करतो. कोणत्याही खेळपट्टीवर विकेट घेण्याची क्षमता त्याच्यामध्ये आहे. शमीने भारताकडून 17 टी-20 सामन्यात 18 विकेट घेतल्या आहेत.

हा आयसीसीचा नियम

आयसीसीच्या नियमांनुसार, स्पर्धा सुरु होण्याच्या एक आठवडा आधीपर्यंत सर्व संघ त्यांच्या मुख्य संघात राखीव खेळाडूंचा समावेश करु शकतात. अशा स्थितीत दक्षिण आफ्रिका आणि ऑस्ट्रेलियाविरुद्धची टी-20 मालिका मोहम्मद शमीच्या कारकिर्दीसाठी टर्निंग पॉंईट ठरु शकते.

या गोलंदाजांना T20 विश्वचषकात स्थान मिळाले

निवड समितीने टी-20 विश्वचषकासाठी (T20 World Cup) केवळ चार वेगवान गोलंदाजांना स्थान दिले आहे. त्यात जसप्रीत बुमराह, भुवनेश्वर कुमार, अर्शदीप सिंग आणि हर्षल पटेल यांना संधी देण्यात आली आहे. कर्णधार रोहित शर्मा (Rohit Sharma) पाचव्या वेगवान गोलंदाजासाठी अष्टपैलू हार्दिक पांड्याचा (Hardik Pandya) वापर करु शकतो. आशिया कपमध्ये मोहम्मद शमीच्या अनुपस्थितीमुळे निवडकर्त्यांना टीकेला सामोरे जावे लागले होते.