IPL 2023 च्या 68 व्या सामन्यात लखनऊ सुपर जायंट्सने कोलकाता नाईट रायडर्सचा एका धावसंख्येने पराभव केला. या विजयासह लखनऊचा संघ प्लेऑफसाठी पात्र ठरणारा तिसरा संघ ठरला आहे.

यापूर्वी, गुजरात टायटन्स आणि चेन्नई सुपर किंग्ज पात्र ठरले आहेत. म्हणजेच आता प्लेऑफसाठी तीन संघ निश्चित झाले असून शेवटच्या स्थानासाठीची मुख्य स्पर्धा आरसीबी आणि मुंबई इंडियन्स यांच्यात आहे.

या सामन्यात केकेआरचा कर्णधार नितीश राणाने पहिल्यांदा गोलंदाजी करण्याचा निर्णय घेतला होता. लखनऊने हा सामना नक्कीच जिंकला पण रिंकू सिंगने पुन्हा एकदा सर्वांची मनं जिंकली.

दरम्यान, निकोलस पूरनच्या अर्धशतकाच्या जोरावर लखनऊ सुपर जायंट्सने (Lucknow Super Giants) पहिल्यांदा फलंदाजी करताना 20 षटकांत 8 गडी गमावून 176 धावा केल्या. लखनऊकडून निकोलस पूरनने 58 धावांची शानदार खेळी खेळली. तर कोलकाताकडून वैभव, सुनील आणि शार्दुल ठाकूर यांनी 2-2 बळी घेतले.

लखनऊने सामना जिंकला आणि रिंकूने मन जिंकले

दुसरीकडे, 177 धावांच्या लक्ष्याचा पाठलाग करताना केकेआरची सुरुवात चांगली झाली. व्यंकटेश अय्यर आणि जेसन रॉय यांनी दमदार सुरुवात करुन दिली.

यानंतर मात्र, त्यांचा डाव फसला. मधल्या फळीतील विकेट्सही संघाने गमावल्या. शेवटी पुन्हा एकदा रिंकू सिंगने शेवटच्या चेंडूपर्यंत झुंज दिली. त्याने 33 चेंडूत 6 चौकार आणि चार षटकारांसह नाबाद 67 धावा केल्या.

केकेआरला शेवटच्या षटकात 21 धावांची गरज होती. अखेर संघाने एका धावसंख्येने सामना गमावला. पण रिंकूने पुन्हा एकदा सर्वांची मनं जिंकली.

पूरन आणि आयुषची शानदार कामगिरी

तत्पूर्वी, निकोलस पूरन आणि आयुष बडोनी यांनी चांगली कामगिरी करुन लखनऊ सुपर जायंट्सला 8 बाद 176 अशी आव्हानात्मक धावसंख्या उभारण्यास मदत केली.

दोघांनी मिळून सहाव्या विकेटसाठी 47 चेंडूत 74 धावांची भागीदारी केली. पूरनने 30 चेंडूत 58 धावांची खेळी खेळली, ज्यात 4 चौकार आणि 5 षटकारांचा समावेश होता. तर आयुषने 21 चेंडूत 2 चौकार आणि 1 षटकार ठोकला.

सलामीवीर क्विंटन डिकॉक (Quinton de Kock) (27 चेंडूत 28 धावा) आणि प्रेरक मंकड (20 चेंडूत 26 धावा) यांनी दुसऱ्या विकेटसाठी 41 धावांची भागीदारी केली.

केकेआरकडून वैभव अरोरा (4 षटकांत 30 धावा), सुनील नरेन (4 षटकांत 28 धावा) आणि शार्दुल ठाकूर (2 षटकांत 27 धावा) यांनी 2-2 बळी घेतले.