भारत विरुद्ध इंग्लंड संघात कसोटी मालिकेतील चौथा सामना शुक्रवारी (23 फेब्रुवारी) रांचीमध्ये सुरू झाला आहे. या सामन्यात इंग्लंड संघाकडून जो रुटने शतकी खेळी करत मोठे विक्रम केले आहेत.
या सामन्यात इंग्लंडने नाणेफेक जिंकून प्रथम फलंदाजी करण्याचा निर्णय घेतला होता. मात्र इंग्लंडने 112 धावांवरच 5 विकेट्स गमावल्या. अशा परिस्थितीत चौथ्या क्रमांकावर फलंदाजीला आलेल्या जो रुटने एक बाजू भक्कम सांभाळली.
त्याला आधी बेन फोक्सबरोबर सहाव्या विकेटसाठी 113 धावांची भागीदारी झाली. पण फोक्स 47 धावांवर बाद झाल्यानंतर ऑली रॉबिन्सनने त्याची चांगली साथ दिली. त्यांच्यातील भागीदारीदरम्यान जो रुटने त्याचे शतक पूर्ण केले. त्याने 84 व्या षटकात 219 चेंडूत त्याचे हे शतक पूर्ण केले.
पहिल्या दिवस अखेर रुटच्या शतकामुळे इंग्लंडने पहिल्या डावात 90 षटकात 7 बाद 302 धावा केल्या आहेत. रुट 106 धावांवर नाबाद खेळत आहे. तसेच ऑली रॉबिन्सन 31 धावांवर नाबाद आहे.
दरम्यान, रुटचे हे भारताविरुद्ध कसोटीतील 10 वे शतक ठरले. त्यामुळे भारताविरुद्ध सर्वाधिक कसोटी शतके करणाऱ्या फलंदाजांच्या यादीत रुटने स्टीव्ह स्मिथला मागे टाकत पहिला क्रमांक मिळवला आहे. स्मिथने कसोटीत भारताविरुद्ध 9 शतके केली आहेत.
तसेच आंतरराष्ट्रीय क्रिकेटमधीलही रुटचे हे भारताविरुद्धचे 13 वे शतक आहे. तो आंतरराष्ट्रीय क्रिकेटमध्ये भारताविरुद्ध सर्वाधिक शतके करणाऱ्या खेळाडूंच्या यादीत दुसऱ्या क्रमांकावर आहे.
भारताविरुद्ध सर्वाधिक आंतरराष्ट्रीय शतके करणाऱ्या फलंदाजांच्या यादीत पहिल्या क्रमांकावर रिकी पाँटिंग आणि स्टीव्ह स्मिथ आहे. या दोघांनीही भारताविरुद्ध आंतररराष्ट्रीय क्रिकेटमध्ये प्रत्येकी 14 शतके केली आहेत.
भारताविरुद्ध कसोटीत सर्वाधिक शतके करणारे क्रिकेटपटू -
10 शतके - जो रुट (52 डाव)
9 शतके - स्टीव्ह स्मिथ (37 डाव)
8 शतके - रिकी पाँटिंग (51 डाव)
8 शतके - विव रिचर्ड्स (41 डाव)
8 शतके - गॅरी सोबर्स (30 डाव)
दरम्यान, रुटचे हे कारकिर्दीतील 31 वे कसोटी शतक ठरले. त्यामुळे सर्वाधिक कसोटी शतके करणाऱ्या फलंदाजांच्या यादीत रुटने मॅथ्यू हेडन आणि शिवनारायण चंद्रपॉल यांना मागे टाकले आहे.
हेडन आणि चंद्रपॉल यांनी 30 कसोटी शतके केली आहेत. रुट आता या यादीत 14 व्या क्रमांकावर आहे. त्याच्यापुढे सध्या 13 खेळाडू आहेत. यात इंग्लंडचा दिग्गज ऍलिस्टर कूक आहे. कूकने ३३ शतके केली आहेत.
तसेच सध्या सक्रीय असलेल्या खेळाडूंमध्ये सर्वाधिक कसोटी शतके केन विलियम्सन आणि स्टीव्ह स्मिथच्या नावावर आहेत. या दोघांनी प्रत्येकी 32 शतके केली आहेत. तसेच रुट आता 31 शतकांसह दुसऱ्या क्रमांकावर आला आहे. विराट 29 शतकांसह चौथ्या क्रमांकावर आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.