पणजी : इंडियन सुपर लीग (आयएसएल) फुटबॉल (Football) स्पर्धेच्या आठव्या मोसमातील बॉक्सिंग डे लढतीत रविवारी (ता. 26) विजयी धडाका राखलेल्या केरळा ब्लास्टर्स संघासमोर जमशेदपूर एफसीचे आव्हान असेल. सामना वास्को येथील टिळक मैदानावर खेळला जाईल.

इव्हान व्हुकोमानोविच यांच्या मार्गदर्शनाखालील केरळा (Kerala) ब्लास्टर्स संघ सध्या जबरदस्त फॉर्ममध्ये आहे. सलग सहा सामने ते अपराजित आहेत. मागील लढतीत त्यांनी चेन्नई (Chennai) एफसीला 3-0 फरकाने हरवले होते, तर त्यापूर्वी याच फरकाने मुंबई (Mumbai) सिटीवर मात केली होती. ओवेन कॉयल यांच्या मार्गदर्शनाखालील जमशेदपूर एफसी संघात सातत्याचा अभाव आहे. ओडिशा एफसीला 4-0 फरकाने हरवल्यानंतर त्यांना मागील लढतीत बंगळूर एफसीने गोलशून्य बरोबरीत रोखले.

केरळा ब्लास्टर्सने रविवारी जमशेदपूर संघाला हरविल्यास त्यांना 15 गुणांसह अग्रस्थानावरील मुंबई सिटीस गाठता येईल. सात लढतीतून प्रत्येकी 3 विजय व बरोबरी आणि एका पराभवासह त्यांचे सध्या 12 गुण आहेत. जमशेदपूर एफसीचेही 12 गुण आहे. त्यामुळे विजय नोंदवल्यास त्यांनाही संयुक्त अग्रस्थानाची संधी राहील. जमशेदपूरने स्पर्धेत आतापर्यंत 13 गोल केले असून केरळा ब्लास्टर्सने त्यांच्यापेक्षा एक गोल कमी नोंदवला आहे.

आमचे खेळाडू खूप मेहनत घेत आहे. त्यामुळे कामगिरीत सातत्य आहे. मात्र, रविवारच्या लढतीत कडवा प्रतिस्पर्धी आहे. त्यामुळे अधिक मेहनत घ्यावी लागेल, असे केरळा ब्लास्टर्सचे प्रशिक्षक व्हुकोमानोविच यांनी सांगितले.