इंडियन सुपर लीग (ISL) फुटबॉल (Football) स्पर्धेतील गतविजेत्या मुंबई सिटी एफसीला शनिवारी पराभवाचा धक्का बसला आहे . स्पर्धेच्या आठव्या मोसमात त्यांना हैदराबाद एफसीने पिछाडीवरून येत 3-1 हरवले . सामना फातोर्डा येथील पंडित जवाहरलाल नेहरू स्टेडियमवर झाला.(ISL: Hyderabad FC won match by 3-1 against Mumbai city)

सामन्याच्या पूर्वार्धात दोन्ही संघ 1-1 गोलबरोबरीत होते. मोरोक्कन मध्यरक्षक अहमद जाहू याने सहाव्या मिनिटास मुंबई सिटीस आघाडी मिळवून दिल्यानंतर 13व्या ब्राझीलियन जुवाव व्हिक्टर याने पेनल्टी फटक्यावर हैदराबादला बरोबरी साधून दिली. नायजेरियन 37 वर्षीय आघाडीपटू बार्थोलोमेव ओगबेचे याने 53व्या मिनिटास हैदराबाद एफसीला 2-1 अशी आघाडी मिळवून दिली. गतमोसमात मुंबई सिटीकडून खेळलेल्या ओगबेचे याचा हा आयएसएलमधील वैयक्तिक 36वा गोल ठरला. 19 वर्षीय युवा आघाडीपटू रोहित दानू याने 82व्या मिनिटास हैदराबादची आघाडी 3-1 अशी मजबूत केली. सामन्यातील बदली खेळाडू रोहितचा हा आयएसएल स्पर्धेतील पहिलाच गोल ठरला.

मानोलो मार्किझ यांच्या मार्गदर्शनाखालील हैदराबादचा हा यंदाच्या स्पर्धेतील पहिला विजय ठरला. अगोदरच्या लढतीत चेन्नईयीनकडून 0-1 फरकाने निसटती हार स्वीकारलेल्या हैदराबादचे आता दोन लढतीतून तीन गुण झाले आहेत. मुंबई सिटीने मागील लढतीत एफसी गोवाचा 3-0 फरकाने धुव्वा उडविला होता, पण शनिवारी हैदराबादच्या नियोजनबद्ध खेळासमोर डेस बकिंगहॅम यांच्या मार्गदर्शनाखालील संघाची मात्रा चालली नाही व त्यांना पहिल्या पराभवास सामोरे जावे लागले. त्यामुळे त्यांचे तीन गुण कायम राहिले.