गतविजेता हैदराबाद एफसी आणि माजी विजेते मुंबई सिटी यांच्यातील इंडियन सुपर लीग (आयएसएल) फुटबॉल सामना आज (रविवारी) उत्कंठावर्धक ठरला. एका गोलच्या पिछाडीवरून हैदराबादने 3-3 गोलबरोबरीमुळे गुणाची कमाई केली.

(ISL football Match between Hyderabad FC and Mumbai City ties)

चिंग्लेन्साना सिंग याच्या स्वयंगोलमुळे 23 व्या मिनिटास मुंबई सिटीला आघाडी मिळाली, पण पूर्वार्धाच्या भरपाई वेळेस हैदराबादने बरोबरी साधली. ब्राझीलियन जुवाव व्हिक्टर याने 48 व्या मिनिटास पेनल्टी फटक्यावर अचूक नेम साधला. 51व्या मिनिटास हालिचरण नरझरी याच्या गोलमळे हैदराबादच्या खाती 2-1 अशी आघाडी जमा झाली.

68 व्या मिनिटास स्कॉटलंडचा ग्रेग स्टुअर्ट याच्या गोलमुळे मुंबई सिटीने आघाडी साधली. जुवाव व्हिक्टरने 76 व्या मिनिटास हैदराबादला पुन्हा 3-2 अशी आघाडी मिळवून दिली. 85 व्या मिनिटास बदली खेळाडू स्पेनचा अल्बर्टो नोगेरा याच्या गोलमुळे मुंबई सिटीस 3-3 अशी गोलबरोबरीसह एक गुण मिळविता आला. या लढतीत दोन्ही संघांच्या बचावफळीचा चांगलाच कस लागला.

एटीके मोहन बागान-चेन्नईयीन लढत आज

कोलकाता येथे सोमवारी एटीके मोहन बागान व चेन्नईयीन एफसी यांच्यात आयएसएल फुटबॉल सामना खेळला जाईल. विवेकानंद युवा भारतीय क्रीडांगणावर हा सामना होईल. उभय संघांत आतापर्यंत स्पर्धेत चार सामने झाले आहेत. एटीके मोहन बागानने दोन लढतीत विजय नोंदविले, तर दोन सामने बरोबरीत राहिले.