पणजी : इंडियन सुपर लीग (आयएसएल) (ISL) फुटबॉल स्पर्धेचा (Football Tournament) आगामी आठवा मोसम पुन्हा एकदा गोव्यातच (Goa) जैव सुरक्षा वातावरणात खेळविण्याचे संकेत आहेत. 

मिळालेल्या माहितीनुसार, कोरोना विषाणू महामारीच्या पार्श्वभूमीवर स्पर्धेचे आयोजक फुटबॉल स्पोर्टस डेव्हलपमेंट लिमिटेड (एफएसडीएल) (FSDL) धोका पत्करण्यास तयार नाहीत. 2020-21 मोसमातील आयएसएल स्पर्धा गोव्यातील तीन स्टेडियमवर जैवसुरक्षा वातावरणात सूरळीत आणि यशस्वी ठरली होती, आता त्याच पार्श्वभूमीवर गोव्यात आणखी एक मोसम खेळविण्यास आयोजकांनी प्राधान्य दिले आहे. सारं काही नियोजनानुसार ठरल्यास, 2021-22 मोसमात आयएसएल स्पर्धा नोव्हेंबर ते मार्च या कालावधीत फातोर्डा येथील पंडित जवाहरलाल नेहरू स्टेडियमवर, बांबोळी येथील जीएमसी स्टेडियम व वास्को येथील टिळक मैदानावर खेळली जाईल.

EURO CUP 2020 बद्दल गोव्यातल्या FOOTBALL प्रेमींना काय वाटत...

गतमोसमात आयोजकांनी सहभागी संघांसाठी निवास आणि सराव मैदानाची व्यवस्था पाहिली होती, यंदा ती जबाबदारी संबंधित संघांना उचलावी लागण्याची शक्यता आहे.  2020-21 साखळी गुणतक्त्यानुसार फातोर्डा येथे मुंबई सिटी, एटीके मोहन बागान, नॉर्थईस्ट युनायटेड, बांबोळी येथे एफसी गोवा, हैदराबाद एफसी, जमशेदपूर एफसी, बंगळूर एफसी, तर वास्को येथे चेन्नईयीन एफसी, ईस्ट बंगाल, केरळा ब्लास्टर्स, ओडिशा एफसी यांच्यासाठी होम ग्राऊंड असेल. 

दहा संघांत स्पर्धा?

गतमोसमात आयएसएल स्पर्धेत 11 संघ होते. सध्या ईस्ट बंगाल व त्यांचे गुंतवणूकदार श्री सिमेंट  यांच्यात करारावरून बिनसले नाही. प्रश्न सुटला नाही, तर कदाचित आयएसल स्पर्धा ईस्ट बंगालविना दहा संघांत खेळली जाऊ शकते.

तर स्पर्धा आखातात

देशात कोरोना विषाणू महामारीची तिसरी लाट येण्याचे अंदाज आहेत, तसे झाल्यास आयएसएल स्पर्धा देशाबाहेर आखातातील देशात खेळविण्याचा निर्णय आयएसएल आयोजक घेऊ शकतात. कतार किंवा संयुक्त अरब अमिरात (यूएई) येथे स्पर्धा होऊ शकते, पण तो अंतिम पर्याय असल्याचे वृत्त आहे.