इंडियन प्रीमियर लीग (IPL) 2022 मध्ये मुंबई इंडियन्स (MI) ची खराब कामगिरी सुरूच आहे. शनिवारी झालेल्या सामन्यात मुंबईचा लखनऊ सुपर जायंट्सकडून (एलएसजी) 18 धावांनी पराभव झाला. स्पर्धेत सलग सहाव्या पराभवानंतर रोहित ब्रिगेड पॉइंट टेबलमध्ये शेवटच्या स्थानावर आहे.

या सामन्यात मुंबईचा युवा फलंदाज इशान किशनही (ishan kishan) फ्लॉप ठरला. ईशानला 17 चेंडूत केवळ 13 धावा करता आल्या. त्याला मार्कस स्टॉइनिसने शानदार चेंडूवर बाद केले. डगआऊटवर परतत असताना, ईशान खूप रागावलेला दिसत होता आणि त्याने बाऊंड्री लाईनवर जोरात बॅट मारली. या घटनेचा व्हिडिओ सोशल मीडियावर व्हायरल होत आहे. इशान किशनचे हे कृत्य आयपीएलच्या आचारसंहितेच्या उल्लंघनाखाली येण्याची शक्यता आहे. इशान किशनला या कृत्यामुळे दंड किंवा ताकीद दिली जाऊ शकते.

IPL 2022 च्या लिलावात मुंबई इंडियन्सने 15.25 कोटी रुपयांच्या किमतीत इशान किशनला त्याच्या संघात सामील केले होते. इशानने गुजरात लायन्स संघाकडून आयपीएलमध्ये पदार्पण केले. त्यानंतर 2018 च्या लिलावात त्याला मुंबई इंडियन्सने 6.2 कोटी रुपयांना विकत घेतले. आयपीएल 2020 मध्ये, इशानने 14 सामन्यांमध्ये 516 धावा करून मुंबईसाठी सर्वाधिक धावा केल्या होत्या.

IPL 2022 च्या सुरुवातीच्या सामन्यांमध्ये इशान किशन उत्कृष्ट फॉर्ममध्ये होता. इशानने दिल्ली कॅपिटल्स आणि राजस्थान रॉयल्सविरुद्धच्या पहिल्या दोन सामन्यात अनुक्रमे नाबाद 81 आणि 54 धावांची खेळी केली. पण यानंतर त्याने शेवटच्या चार डावात 14, 26, 3 आणि 13 धावा केल्या आहेत. म्हणजे किशनच्या बॅटने या मोसमात सहा डावात 38.20 च्या सरासरीने आणि 117.17 च्या स्ट्राईक रेटने 191 धावा केल्या आहेत. तो लवकरात लवकर फॉर्ममध्ये येईल, अशी आशा मुंबई इंडियन्सला असेल.

अशी होती स्पर्धा...

सामन्याबद्दल बोलायचे झाले तर केएल राहुलच्या संघाने निर्धारित 20 षटकात 4 गडी गमावून 199 धावा केल्या. कर्णधार केएल राहुलने नाबाद 103 धावांची खेळी केली, ज्यात नऊ चौकार आणि पाच षटकारांचा समावेश होता. प्रत्युत्तरात मुंबईला 20 षटकांत 9 गडी बाद 181 धावाच करता आल्या. संघासाठी सूर्यकुमार यादवने 37 धावांचे योगदान दिले तर डेवाल्ड ब्रेव्हिसने 31 धावांचे योगदान दिले. लखनौकडून आवेश खानने सर्वाधिक तीन बळी घेतले.