Rajasthan Royals vs Sunrisers Hyderabad: इंडियन प्रीमियर लीग 2023 स्पर्धेत रविवारी राजस्थान रॉयल्स विरुद्ध सनरायझर्स हैदराबाद संघात सामना होत आहे. हा सामना राजस्थानच्या घरच्या मैदानावर म्हणजेच सवाई मानसिंग स्टेडियमवर होत आहे. हा या स्पर्धेतील 52 वा सामना आहे.

या सामन्यात राजस्थान रॉयल्स संघाचा कर्णधार संजू सॅमसनने नाणेफेक जिंकली असून प्रथम फलंदाजी करण्याचा निर्णय घेतला आहे.

या सामन्यासाठी दोन्ही संघात मोठे बदल झाले आहेत. राजस्थानकडून जो रुटचे पदार्पण झाले आहे. त्यामुळे रुट पहिल्यांदाच आयपीएलमध्ये खेळताना दिसणार आहे. त्याचबरोबर हैदराबाद संघाकडून विवरांत शर्माने पदार्पण केले आहे. तसेच ग्लेन फिलिपलाही या सामन्यासाठी संधी मिळाली असून हॅरी ब्रुकला संघातून वगळण्यात आले आहे.

या सामन्यासाठी सनरायझर्स हैदराबादने कर्णधार एडन मार्करमव्यतिरिक्त हेन्रिक क्लासेन, ग्लेन फिलिप आणि मार्को यान्सिन या परदेशी खेळाडूंना प्लेइंग इलेव्हनमध्ये संधी दिली आहे. तसेच राजस्थानने जोस बटलर, जो रुट आणि शिमरॉन हेटमायर या परदेशी खेळाडूंला प्लेइंग इलेव्हनमध्ये संधी दिली आहे.

त्यामुळे हैदराबादने प्लेइंग इलेव्हनमध्ये 4 परदेशी खेळाडूंना संधी दिल्याने त्यांना इम्पॅक्ट प्लेअर म्हणून केवळ भारतीय खेळाडूला वापरता येणार आहे, तर राजस्थान मात्र प्लेइंग इलेव्हनमध्ये तीनच परदेशी खेळाडू असल्याने इम्पॅक्ट प्लेअर म्हणून भारतीय किंवा परदेशी खेळाडूला वापरू शकतात.

इम्पॅक्ट प्लेअरच्या पर्यायांसाठी राजस्थानने राखीव खेळाडूंमध्ये देवदत्त पडिक्कल, ऍडम झम्पा, रियान पराग, जेसन होल्डर आणि ओबेड मॅकॉय यांना संधी दिली आहे, तर हैदराबादने हॅरी ब्रुक, अनमोलप्रीत सिंग, मयंक डागर, नितीश रेड्डी आणि सनवीर सिंग यांना राखीव खेळाडूंमध्ये निवडले आहे.

असे आहेत प्लेइंग इलेव्हन -

• राजस्थान रॉयल्स - यशस्वी जयस्वाल, जोस बटलर, संजू सॅमसन (यष्टीरक्षक/कर्णधार), जो रूट, ध्रुव जुरेल, शिमरॉन हेटमायर, रविचंद्रन अश्विन, मुरुगन अश्विन, संदीप शर्मा, कुलदीप यादव, युझवेंद्र चहल

• सनरायझर्स हैदराबाद - अभिषेक शर्मा, राहुल त्रिपाठी, एडेन मार्करम (कर्णधार), हेन्रिक क्लासेन (यष्टीरक्षक), ग्लेन फिलिप्स, अब्दुल समद, मार्को यान्सिन, विवरांत शर्मा, मयंक मार्कंडे, भुवनेश्वर कुमार, टी नटराजन